काठमाडौं, असार ३१ – नागरिक लगानी कोषद्वारा सञ्चालन गरिएको उपदान तथा पेन्सन योजनामा नेशनल लघुवित्त वित्तीय संस्था लिमिटेड आवद्ध भएको छ। यससँगै लघुवित्तमा कार्यरत करिब ६ सय कर्मचारीले सो योजनाबाट लाभ लिन सक्नेछन्।

उक्त योजनामा सहभागिता जनाउने सम्बन्धी सम्झौतापत्रमा कोषको तर्फबाट कार्यकारी निर्देशक पर्वत कुमार कार्की र लघुवित्तको तर्फबाट प्रमुख कार्यकारी अधिकृत रामबहादुर यादवले हस्ताक्षर गर्नुभएको हो।

कोषको यो योजना संविधानतः संगठित संस्था तथा संस्थाका कर्मचारीहरूका लागि लक्षित रहेको छ। योजनाअनुसार, योगदानमा आधारित (contributory) वा गैर-योगदानमा आधारित (non-contributory) आधारमा संस्था तथा संस्थाका कर्मचारीहरू उपदान कोषमा सहभागी हुन सक्नेछन्।

नेपाल राष्ट्र बैंकबाट 'घ' वर्गको इजाजतप्राप्त राष्ट्रियस्तरको यो लघुवित्त संस्था हाल देशभर १८५ शाखामार्फत ७४ जिल्लामा २ लाख ४१ हजार घरपरिवारलाई लघुवित्त सेवा प्रदान गर्दै आइरहेको छ।

नागरिक लगानी कोषको उपदान तथा पेन्सन योजना सार्वजनिक तथा निजी क्षेत्रका कर्मचारीहरूका लागि सुरक्षित भविष्य र सामाजिक सुरक्षाको सुनिश्चितता दिने उद्देश्यसहित सञ्चालनमा ल्याइएको हो।

यस प्रकारको सहकार्यले लघुवित्त क्षेत्रका कर्मचारीहरूलाई सामाजिक सुरक्षा प्रणालीमा समावेश गर्ने लक्ष्यमा टेवा पुग्ने कोषको विश्वास छ।