मुगु ।  मुगु जिल्लाको गमगढी बजारमा रहेको जिल्ला आँखा उपचार केन्द्रमा तीन दिने निशुल्क आँखा शिविर सम्पन्न भएको छ । उक्त शिविरमा कुल १ हजार १३२ जनाले आँखा चेकजाँच गराएका छन्, जसमा ६८६ महिला र ४४६ पुरुष रहेका थिए । त्यस्तै, १०४ जनाको मोतियाबिन्दु शल्यक्रिया गरिएको छ ।

नेपाल नेत्र ज्योति संघको आयोजनामा, हिमाल आँखा अस्पताल पोखराको प्राविधिक सहयोग र आई केयर फाउन्डेशन नेपालको आर्थिक सहयोगमा यो शिविर सञ्चालन भएको हो। शिविरमा ५२९ जना बिरामीलाई निशुल्क चस्मा र औषधि वितरण गरिएको नेपाल नेत्र ज्योति संघ केन्द्रका उपाध्यक्ष तिलक बहादुर मल्लले दिएका छन् ।

शिविरमा सहभागी भएका बिरामीहरूको स्वास्थ्य अवस्था परिक्षण गर्दा धेरैजसोलाई धूलो, धुवा र आगो बाल्ने कार्यका कारण आँखामा समस्या उत्पन्न भएको पाइएको छ । यहाँका नागरिकहरूको आँखामा काँचो उमेरमै मोतियाबिन्दु जस्ता समस्या देखिने गरेको डा. केष्णा गुरुङ्गले बताइन् ।

लामो समयदेखि आँखा नदेख्ने, आँखा दुख्ने,आँखा चिलाउने समस्या हुँदा घरदेखि टाढासम्म हिड्न निकै समस्या भएको खत्याड गाँउपालिकाका ५९ बर्ष कर्ण बहादुर बाँनियाले बताए । उनले अहिले आँखाको अप्रेशन हुँदा घरमा भगवान भेटाएको महसुस भएको बताए ।