पर्याप्त निद्रा पुगेपनि सुस्त महसुस हुनु पोषणको कमी, डिहाइड्रेसन, अस्वस्थ आहार, तनाव, अत्यधिक क्याफिन वा अनियमित दिनचर्याको कारणले हुन सक्छ । हामीले पर्याप्त निद्रापछि ताजा महसुस हुन्छ भन्ने विश्वास गर्दछौं । तर, कहिलेकाहीं मानिसहरू ७–८ घण्टा निद्रा पूरा गर्दापनि दिनभरि सुस्त, अल्छी र ऊर्जाको कमी महसुस गर्छन् । यसका धेरै कारणहरू हुन सक्छन्, जस्तै शरीरमा पोषणको कमी, उचित आहारको अभाव, पानीको कमी, पाचन प्रणाली खराब हुनु वा क्याफिनको अत्यधिक सेवन ।

यसबाहेक, मानसिक तनाव र अनियमित दिनचर्याले पनि यो समस्या बढाउन सक्छ । लगातारको आलस्यले काम गर्ने क्षमता मात्रै नभई मानसिक स्वास्थ्यलाई पनि असर गर्न सक्छ । केही सरल घरेलु उपचारहरू अपनाएर यस्ता समस्याबाट राहत पाउन सकिन्छ । 

भिजाइएको बदाम र किसमिसको सेवन : बदाम र किसमिसमा प्रशस्त मात्रामा भिटामिन र खनिजहरू हुन्छन्, जसले शरीरलाई ऊर्जावान राख्छ । रातभर भिजाएर खाँदा यसमा रहेका पोषक तत्वहरू राम्रोसँग शोषित हुन्छन्, जसले आलस्य कम गर्छ र शरीरमा ऊर्जाको स्तर बढाउँछ । भिजेको बदाम र किसमिसले पाचन प्रणालीलाई पनि बलियो बनाउँछ, जसले शरीरमा पोषणको कमीलाई हटाउन मद्दत गर्दछ । 

नरिवल पानी : दिनभरि सुस्त महसुस गर्नुहुन्छ भने, नरिवल पानीको सेवन गर्नु फाइदाजनक हुनसक्छ । नरिवल पानीले शरीरलाई हाइड्रेट मात्र गर्दैन, इलेक्ट्रोलाइट्सको कमीलाई पनि हटाउँछ, जसले थकान कम गर्छ । साथै, यसमा हुने प्रोबायोटिक्सले पाचन प्रणालीलाई स्वस्थ राखेर शरीरमा उर्जा कायम राख्न मद्दत गर्दछ । 

अमला वा तुलसीको रस : अमला भिटामिन सीको एक उत्कृष्ट स्रोत हो, जसले शरीरको रोग प्रतिरोधात्मक क्षमता बढाउँछ र मेटाबोलिज्मलाई बलियो बनाउन मद्दत गर्दछ । साथै, तुलसीको रसमा एन्टी–अक्सिडेन्ट हुन्छ, जसले शरीरलाई विषाक्तरहित(डिटोक्सिफाइ) गर्न र आलस्य हटाउन मद्दत गर्छ । हरेक विहान खाली पेटमा एक चम्चा गुलियो वा तुलसीको रस पिउनाले शरीरमा दिनभरि ऊर्जा कायम रहन्छ ।

गुड र सौंफको पानी : गुडमा फलाम र खनिजहरू हुन्छन्, जसले शरीरमा हेमोग्लोबिन बढाउँछ र थकान कम गर्न मद्दत गर्छ । सौंफले पाचन प्रणालीलाई बलियो बनाउँछ र शरीरलाई हलुका र ऊर्जावान राख्न मद्दत गर्दछ । हरेक बिहान मनतातो पानीमा गुड र सौंफ मिसाएर पिउँदा आलस्य कम गर्न सकिन्छ । 

खजूर र दूध सेवन : खजूर एक प्राकृतिक ऊर्जा दिने चिज हो । यसले थकान र कमजोरी हटाउन मद्दत गर्दछ । दूधमा क्याल्सियम र प्रोटिन हुन्छ, जसले शरीरलाई बलियो बनाउँछ । राति सुत्नुअघि मनतातो दूधमा दुई–तीनवटा खजूर मिसाएर पिउँदा बिहान ताजा महसुस गर्न सकिन्छ । (साँघु साप्ताहिक, २०८१ चैत ११)