काठमाडाैं । नेपालका प्रधान सेनापति महारथी अशोक राज सिग्देलले मित्रराष्ट्र भारतको औपचारिक भ्रमण सम्पन्न गरी आज स्वदेश फिर्ता भएका छन्। भारतीय स्थल सेनाध्यक्ष जनरल उपेन्द्र द्विवेदीको निमन्त्रणामा  २०८१ मंसिर २६ गते भारत भ्रमणमा जानु भएका प्रधान सेनापति सिग्देलको स्वागत त्रिभुवन अन्तर्राष्ट्रिय विमानस्थलमा बलाध्यक्ष रथी प्रदीप जंग के.सी.ले गरेका थिए ।

भारत भ्रमणका क्रममा २०८१ मंसिर २७ गते प्रधान सेनापतिलाई भारतीय राष्ट्रपति श्रीमती द्रौपदी मुर्मुले राष्ट्रपति भवनमा आयोजित एक भव्य समारोहमा भारतीय स्थल सेनाको मानार्थ महारथी (Honorary Rank of General of the Indian Army) उपाधीले सम्मानित गर्नुभएको थियो।

भारतीय मिलिटरी एकेडेमीमा प्रमुख अतिथि

भारतको देहरादुनस्थित भारतीय मिलिटरी एकेडेमीमा तालिमरत नेपाली सेनाका अधिकृत क्याडेट प्रविन पाण्डेले ३५ जना विदेशी क्याडेटहरूको बीचबाट सर्वोत्कृष्ट विदेशी शिक्षार्थीको रूपमा सम्मान प्राप्त गरेका थिए। प्रधान सेनापति सिग्देल उक्त समारोहमा प्रमुख अतिथि (Reviewing Officer) को रूपमा उपस्थित हुनुहुन्थ्यो, जसले नेपाली सेनाको उत्कृष्टता र परम्परालाई पनि विश्वसामु प्रस्तुत गर्ने अवसर पाएको छ।

भारतका उच्च सुरक्षा अधिकारीहरूसँग शिष्टाचार भेट

भ्रमणको क्रममा प्रधान सेनापति सिग्देलले भारतीय रक्षा मन्त्री  राजनाथ सिंह, राष्ट्रिय सुरक्षा सल्लाहकार अजित डोभल, Chief of Defence Staff जनरल अनिल चौहान, स्थल सेनाध्यक्ष जनरल उपेन्द्र द्विवेदी, रक्षा सचिव र विदेश सचिवसँग शिष्टाचार भेट पनि गर्नुभएको थियो। यस भ्रमणले दुई देशका सेनाबीच रहेको साझेदारी र आपसी सम्मानको सम्बन्धलाई थप सुदृढ बनाएको विश्वास व्यक्त गरिएको छ।

सैन्य संरचनाहरूको भ्रमण

प्रधान सेनापति सिग्देलले भारतीय सेनाको Southern Command अन्तर्गतका विभिन्न रणनीतिक सैनिक संरचनाहरूको भ्रमण समेत गर्नुभएको थियो। उहाँले यस अवसरमा एयरफोर्स स्टेशन र Tata Advanced System Limited जस्ता महत्वपूर्ण सैनिक संरचनाको अवलोकन गर्नुभयो, जसले नेपाल र भारतका सेनाबीचको सहकार्य र परस्पर सम्बन्धलाई अझ सुदृढ बनाउने आशा उत्पन्न गरेको छ।

उच्चस्तरीय भ्रमणको महत्त्व

प्रधान सेनापति सिग्देलको यस उच्चस्तरीय भ्रमण र दुई देशका सेनापतिलाई मानार्थ महारथीको उपाधीले सम्मानित गर्ने परम्पराले नेपाली सेना र भारतीय सेनाबीचको मित्रता र आपसी सहयोगलाई थप मजबुत बनाएको नेपाली सेनाले बताएकाे छ। यस भ्रमणले दुई देशका बीचको द्विपक्षीय सम्बन्ध र सैन्य सहकार्यमा नयाँ उचाइ पुर्‍याउने विश्वास व्यक्त गरिएको छ।

नेपाली सेनाले यस प्रकारको भ्रमणलाई महत्व दिँदै, यसले भविष्यमा नेपाल र भारतका सेनाबीच थप आपसी सहयोग र पारस्परिक हितका अवसरहरू सिर्जना गर्ने आशा व्यक्त गरेको छ।