काठमाडौँ, ५ कात्तिक । प्रहरी महानिरीक्षक वसन्तबहादुर कुँवरले बदलिँदो परिवेशमा प्रहरीमाथि चुनौती, जिम्मेवारी, अवसर र दायित्व फराकिलो बन्दै गएकाले सोही अनुसार अघि बढ्न निर्देशन दिनुभएको छ ।
राष्ट्रिय प्रहरी प्रशिक्षण प्रतिष्ठान महाराजगञ्जमा त्रिभुवन विश्वविद्यालयको सम्बन्धनमा सञ्चालित ‘पोष्ट ग्य्राजुएट डिप्लोमा ईन पोलिन साइन्स’, कार्यक्रममा समावेश प्रहरी निरीक्षक आधारभूत तालिम १८३औँ समूहको आज उहाँले उद्घाटन गर्नुभएको हो ।
उक्त कार्यक्रममा बोल्दै उहाँले सङ्गठित अपराधको वृद्धि एवम् प्रगतिशील विज्ञान र प्रविधिले उब्जाएका नवीनतम् चुनौतीको सामना गर्न अन्तर्राष्ट्रिय जगतमै पुलिसिङमा धेरै परिवर्तन भएको जानकारी गराउनुभयो । सोही अनुरूप विगत र वर्तमान मात्र नभई भविष्यसमेतमा सक्षम र दक्ष ठहरिने गरी यस्ता प्रशिक्षण सञ्चालन आवश्यक रहेको उहाँको भनाइ छ ।
नेपाल प्रहरी सङ्गठनको आधुनिकीकरण एवम् सुदृढीकरण सम्बोधन गर्न तथा सक्षम नेतृत्व तयार गर्न राष्ट्रिय र अन्तरराष्ट्रियस्तरमा समेत प्रतिस्पर्धा गर्न सक्ने सक्षम जनशक्ति उत्पादन गर्न उक्त कोर्स सहयोगसिद्ध हुने विश्वास उहाँले व्यक्त गर्नुभयो ।
प्रहरी महानिरीक्षक कुँवरले नेपाल प्रहरी राज्यको एक मात्र दुरदराजसम्म फैलिएको आम नागरिकको सेवामा चौबिसै घण्टा परिचालित असाहय, पीडित र अन्यायमा परेका नागरिकको आड भरोसाको केन्द्र रहेको चर्चा गर्नुभयो ।
कार्यक्रममा त्रिभुवन विश्वविद्यालय व्यवस्थापन सङ्कायका डीन प्राडा डिल्लीराज शर्माले नेपाल प्रहरी निस्वार्थरूपमा सेवा प्रदान गर्ने सङ्गठन भएकाले आफ्नो कमी कमजोरीलाई सुधार गर्न प्रतिबद्ध भएर लाग्नुपर्ने बताउनुभयो ।
सोही प्रतिष्ठानका कार्यकारी निर्देशक प्रहरी अतिरिक्त महानिरीक्षक सुदिप गिरीले धन्यवाद ज्ञापन गर्नुभएको थियो । उक्त तालिममा खुला प्रतिस्पर्धाबाट उत्तीर्ण विभागीयतर्फका ६५ प्रहरी निरीक्षक र तीन नवनियुक्त प्रहरी निरीक्षक गरी ६८ जनाको सहभागिता रहेको थियो ।
---
प्रतिकृया दिनुहोस