काठमाडौँ, चैत १५ गते । नेपाली कांग्रेसका नेता तथा पूर्व उर्जामन्त्री दीपक कुमार खड्का पक्राउ परेका छन्। नेपाल प्रहरीको केन्द्रीय अनुसन्धान ब्यूरो (सीआइबी)ले उनलाई पक्राउ गरेको हो। प्रहरीको केन्द्रीय अनुसन्धान ब्युरो (सीआईबी)ले खड्कालाई २०८२ चैत १५ गते बिहान बुढानीलकण्ठबाट पक्राउ गरेको हो ।
प्रहरी स्रोतका अनुसार, सम्पत्ति शुद्धीकरणसम्बन्धी मुद्दाको अनुसन्धानका क्रममा खड्कालाई नियन्त्रणमा लिइएको हो। पछिल्लो समय उनको सम्पत्तिको स्रोत, लेनदेन तथा आर्थिक गतिविधिबारे गम्भीर अनुसन्धान भइरहेको जनाइएको छ।
विशेष गरी २०८२ भदौमा भएको ‘जेनजी’ आन्दोलनका क्रममा खड्काको निजी निवासमा आगजनी हुँदा ठूलो परिमाणमा नगद जलेको दाबी गर्दै सार्वजनिक भएको भिडियो सामाजिक सञ्जालमा भाइरल बनेको थियो। उक्त घटनाले उनको सम्पत्तिको स्रोत र प्रकृतिबारे थप शंका उत्पन्न भएपछि अनुसन्धान अघि बढाइएको स्रोतले जनाएको छ।
सीआइबीले खड्कामाथि गैरकानूनी रूपमा आर्जित सम्पत्ति, सम्भावित अवैध आर्थिक कारोबार तथा सम्पत्ति शुद्धीकरणसँग सम्बन्धित गतिविधिबारे विस्तृत अनुसन्धान गरिरहेको बताइएको छ। प्रारम्भिक अनुसन्धानका आधारमा उनलाई पक्राउ गरिएको र आवश्यक प्रमाण संकलन प्रक्रिया जारी रहेको प्रहरीको भनाइ छ।
यस घटनाले नेपाली कांग्रेसभित्र समेत तरङ्ग सिर्जना गरेको छ। पार्टीका केही नेताहरूले अनुसन्धानलाई निष्पक्ष र कानूनी प्रक्रियाअनुसार अघि बढाउनुपर्ने धारणा व्यक्त गरेका छन् भने कतिपयले यसलाई राजनीतिक कोणबाट समेत हेर्न थालेका छन्।
उता, कानून व्यवसायीहरूका अनुसार सम्पत्ति शुद्धीकरणसम्बन्धी मुद्दा गम्भीर प्रकृतिको हुने भएकाले अनुसन्धान प्रक्रियामा आर्थिक स्रोत, बैंकिङ कारोबार, सम्पत्ति विवरण र कर सम्बन्धी तथ्यहरूको सूक्ष्म अध्ययन गरिनेछ।
प्रहरीले खड्कालाई आवश्यक बयान तथा थप अनुसन्धानका लागि हिरासतमा राखेको छ। आगामी दिनमा अदालतमा म्याद थप गरी अनुसन्धान अघि बढाइने तयारी गरिएको जनाइएको छ।
यस प्रकरणले उच्च राजनीतिक तहमा आर्थिक पारदर्शिता र जवाफदेहिताको विषय पुनः बहसमा ल्याएको छ।
