• आइतबार-जेठ-१३-२०८१

कलुवापुर–बेलौरी सडक कालोपत्रे गर्ने कार्य चाँडै अगाडि बढ्छ : परराष्ट्रमन्त्री साउद


कञ्चनपुर, ४ मङ्सिर । परराष्ट्रमन्त्री नारायणप्रकाश साउदले कलुवापुर– बेलौरी सडकखण्डको कालोपत्रे गर्ने कार्यलाई चाँडै अगाडि बढाइने बताउनुभएको छ । 

 

आज शुक्लाफाँटा नगरपालिका–११ कलुवापुरले आयोजना गरेको कार्यक्रममा मन्तव्य राख्नुहुँदै उहाँले चुनावका बेला सडक कालोपत्रे गर्ने प्रतिबद्धता गरेको कुरालाई नबिर्सिएको बताउनुभयो । “सडकको अवस्थाबारे मलाई राम्ररी थाहा छ”, उहाँले भन्नुभयो, “अबेर जरुर भएको छ, अन्धेर हुन दिदैनौँ ।” 

 

सडकको क्षेत्राधिकार कायम गर्नेबारे नगरपालिकाले समन्वय गर्नुपर्ने उल्लेख गर्नुहुँदै उहाँले कालोपत्रका लागि सुदूरपश्चिम प्रदेशका मुख्य सचिव, भौतिक पूर्वाधार मन्त्रालयका सचिव र निर्माण व्यवसायीलाई निर्देशन दिई सकेको बताउनुभयो ।

 

सडककै लागि गुनासो सुन्नु नपरोस् ठेक्का सम्झौता बमोजिमको कार्य निर्धारित समयभित्रै पूरा गर्न गराउनका लागि निर्माण व्यवसायी र सम्बद्ध पक्षसँग कुरा गरेको उहाँले बताउनुभयो ।

 

“सडक कालोपत्रे नहुँदा हिउँदमा धुलाम्मे र वर्षातका बेला हिलाम्मे हुने कुराबारे जानकार छु”, उहाँले भन्नुभयो, “चिन्ता र चासो लिएर यस कार्यलाई काठमाडौँ फर्केपछि तत्काल अगाडि बढाउन लगाउछु ।” नगरपालिकामा निर्माण हुँदै गरेको फोहरमैला व्यवस्थापन केन्द्रमा फोहर प्रशोधन गर्ने ठूला मेसिन राखेर व्यवस्थित गरिने उहाँले बताउनुभयो ।

 

दुई÷तीन वटा नगरपालिकाको फोहर व्यवस्थापन गर्ने साझा केन्द्रका रुपमा यसलाई विकास गरिनुपर्ने उहाँको भनाइ थियो । फोहरमैला व्यवस्थापन केन्द्रको प्रभावित क्षेत्रका बासिन्दाका हितलाई ध्यानमा राखेर कार्य अगाडि बढाइनुपर्नेमा उहाँको जोड थियो ।

 

बहुवर्षीय ठेक्का सम्झौता गरी झलारी बजार क्षेत्र भएर बग्ने सनवोरा नदीमा बलियो तटबन्ध निर्माणका लागि पहल गर्ने उहाँले व्यक्त गर्नुभयो । विकास गर्ने कुरा जनप्रतिनिधिको दायित्वभित्र पर्ने कुरा भएकाले यसबाट पछि हटन नमिल्ने उहाँको जिकिर थियो ।

 

शुक्लाफाँटा नगरपालिका–११ का वडाध्यक्ष शेरबहादुर साउदले मन्त्री साउदलाई २२ बुँदे मागसहितको ज्ञापनपत्र बुझाउनुभएको थियो । मन्त्री साउदलाई बुझाइएको ज्ञापनपत्रमा कलुवापुर–बेलौरी सडकखण्ड कालोपत्रे गर्ने, रामजानकी मन्दिरमा विवाह मण्डप निर्माणसम्मका योजना समेटिएका छन् । 

 

यसैगरी, कलुवापुर बजार क्षेत्रमा ढल निकास, वडा कार्यालय तथा आधारभूत स्वास्थ्य सेवा केन्द्र वरिपरि पर्खाल निर्माण, प्रादेशिक आयुर्वेदिक अस्पतालको यथाशीघ्र निर्माण, सामुदायिक भूमि व्यवस्थापन स्रोत केन्द्रको कार्यालय भवन निर्माण, वडामा खेलमैदान तथा कभर्ड हल निर्माणको माग ज्ञापनत्रमा गरिएको छ ।
---

 

(तस्बिरमा परराष्ट्रमन्त्री नारायणप्रकाश साउद सोमबार शुक्लाफाँटा नगरपालिका-१ कलुवापुरका स्थानीयसँग भेटघाट गर्नुहुँदै। तस्बिरः राजेन्द्रप्रसाद पनेरु / रासस)
 

प्रतिकृया दिनुहोस