विश्व नै कोभिड १९ को महामारीको चपेटामा परेको यो विषम परिस्थितिमा हामीले गायन प्रतिभा प्रोत्साहनका लागि प्रतिस्पर्धात्मक अन्तर्राष्ट्रिय अनलाईन गायन प्रतियोगिता "हल अफ फेम सिजन २" शुभराम्भ गर्न गाइरहेका छौं । हाम्रो उद्देश्य नेपाल र नेपालभन्दा बाहिर विश्वका कुना कुनामा छरिएर रहेका नेपालीहरुलाई नेपाली गीत संगीतको माध्यमबाट जोड्दै उनीहरुको सिर्जनात्मकतालाई निखार्दै संगीत क्षेत्रलाई एउटा प्रतिभाशाली सर्जक प्रदान गर्ने नै हो ।
पहिलो सिजनको सफलताका साथ समाप्ति पश्चात हामीले यसलाई अझ बृहद बनाउँदै लाखौं दर्शक श्रोतामाझ लैजाने जमर्को गरेका हौं । हामीले आयोजना गर्न लागेको हल अफ फेमलाई एमएनटीभी अष्ट्रेलियाका साथै नेपालको एक राष्ट्रियस्तरको टेलिभिजनबाट समेत प्रशारण गर्ने योजना बनाएका छौं ।
कार्यक्रम विशुद्ध सांगीतिक प्रतिस्पर्धा हुनेछ । यसमा निर्णायक मण्डलको चयन गर्ने कार्य हामीले सम्पन्न गरेका छौं । हल अफ फेम सिजन २ को निर्णायकको भूमिकामा वरिष्ठ गायक दिप श्रेष्ठ, कन्दरा व्याण्डका गायक विवेक श्रेष्ठ र चर्चित गायिका रजिना रिमाल रहनुहुनेछ । कार्यक्रममा युवा पुस्तालाई जोड्दैजाने अभिप्रायले यसको सञ्चालन गर्ने जिम्मेवारी हामीले मिस ओसेनिया नेपाल २०२० जेमिना श्रेष्ठलाई दिएका छौं ।
यस प्रतिस्पर्धामा सहभागी हुन आवेदन दिने समय आगामी नोभेम्बर १५ सम्म राखिएको छ । निर्धारित समयसीमाभित्र प्राप्त प्राप्त भएका गीतहरुमध्येबाट टप ५० को छनोट गरी निर्णायक मण्डल समक्ष प्रस्तुत गरिनेछ । त्यसपछि क्रमशः खुला प्रतिस्पर्धामा समावेश गर्दै सर्वोत्कृष्ट गायक वा गायिकाको चयन हुनेछ । आम दर्शकले अफिसियल फेसबुकमार्फत अभिव्यक्त गरेको मत र निर्णायक मण्डलको मूल्यांकनका आधारमा निर्णय हुनेछ ।
"हल अफ फेम सिजन-२" उपाधि जित्ने प्रतियोगीले पाँच लाख नेपाली रुपैयाँ बराबरको प्याकेज प्राप्त गर्नेछन् । जसमा एक लाख नगद, गीत रेकर्ड, म्युजिक भिडियो निर्माण लगायतको प्याकेज समावेश छ । कार्यक्रमलाई नै समर्पित गर्दै हामीले छुट्टै वेवसाईट [email protected] पनि सञ्चालनमा ल्याएका छौं । यो साईटलाई आजको यो पत्रकार सम्मेलनबाट नै हामीले सार्वजनिक पनि गरेका छौं । यो वेवसाईटमा हल अफ फेमसँग सम्बन्धित सबै सूचना तथा सामग्रीहरु प्रकाशित गर्नेछौं ।
एमएनटीभी अष्ट्रेलिया सन् २०१२ मा स्थापना भई निरन्तर सञ्चालनमा रहेको छ । यसको अध्यक्ष मेलबर्नका सफल व्यवसायी एवं सामाजिक अभियन्ता चन्द्र योञ्जन रहनुभएको छ भने सम्पादकीय नेतृत्व चिरञ्जीवी देवकोटाले गर्नुभएको छ । हल अफ फेम सिजन २ को संयोजन संस्थाका ब्रान्ड म्यानेजर रमन झा र चर्चित म्युजिक भिडियो निर्देशक जीवन रसाईलीले गर्नुहुनेछ ।
कार्यक्रमलाई मेट्स ईन्टरनेशनल र क्वीन्सफोर्ड कलेजले मुख्य प्रायोजन गरेको छ भने आरजीआईटी अष्ट्रेलिया, अल्टिमेट ईन्ष्टिच्युट अफ अष्ट्रेलिया युआईएले प्रायोजन गरेका छन् । यस्तै सिटी एक्सप्रेस मनी ट्रान्सफर, ग्रेस ईन्टरनेशनल एजुकेशन एण्ड माईग्रेसन, काठमाडौं प्रोपर्टीजको साथ रहेको छ ।
प्रतिकृया दिनुहोस