काठमाडौँ, ३१ जेठ । नेपालको वास्तविक नक्सा निशान छापमा समावेश गर्न प्रस्तुत ‘नेपालको संविधान (दोस्रो संशोधन) विधेयक, २०७७’ लाई प्रतिनिधिसभाको आजको बैठकको दुई तिहाइभन्दा बढी मतले पारित गरेको छ ।
दशकौँदेखि भारतको कब्जामा रहेको लिम्पियाधुरा, लिपुलेक, कालापानीलगायत नेपालको भूभाग समेटिएको नक्शा नेपालको संविधानको अनुसूची ३ मा रहेको निशान छापमा समावेश गर्न ल्याइएको उक्त विधेयक आजको प्रतिनिधिसभा बैठकबाट पारित भएको हो ।
संविधानतः विधेयक पारित हुन प्रतिनिधिसभामा हाल कायम रहेका सदस्यको दुई तिहाइ बहुमत आवश्यक पर्छ । आजको मतदानमा सबै सहभागीले पक्षमा मतदान गरी राष्ट्रियताका विषयमा अभूतपूर्व एकता प्रदर्शन गरेका छन् ।
आज भएको मतदानमा संशोधनका पक्षमा २५८ मत प्राप्त भएको थियो । यसअघि विसं २०७२ फागुन ११ गते पहिलो पटक संविधान संशोधन भएको थियो । प्रतिनिधिसभाका कुल सदस्यमध्ये बैठकमा सहभागी २५८ जनाले मतदानमा भाग लिनुभएको थियो ।
सो सङ्ख्या प्रतिनिधिसभामा तत्काल कायम २७५ सदस्यको दुई तिहाइभन्दा बढी हो । विपक्षमा पनि कुनै पनि मत परेन । दुई तिहाइभन्दा बढी (२७५ मध्ये उपस्थित २५८, पक्षमा २५८ अर्थात्, उपस्थिति संख्याकाे शतप्रतिशत) मतबाट नेपालकाे संविधान (दाेस्राे) संशाेधन विधेयक २०७७ प्रतिनिधि सभाबाट सर्वसम्मतिले पारित भएकाे छ।
मतदान हुनुअघि संशोधन प्रस्तावलाई सभामुख अग्निप्रसाद सापकोटाले ध्वनिमतका लागि निर्णयार्थ प्रस्तुत गर्दा हुन्न भन्ने आवाज नसुनिएपछि विधेयक सर्वसम्मत पारित भएको घोषणा गर्नुभएको थियो । त्यसपछि सांसदको दस्तखतसहितको मतदानका लागि मत विभाजन गरिएको थियो ।
यसअघि कानून, न्याय तथा संसदीय मामिलामन्त्री डा शिवमाया तुम्बाहाङ्फेले ‘नेपालको संविधान (दोस्रो संशोधन) विधेयक, २०७७ पारित गरियोस्’ भनी प्रस्ताव प्रस्तुत गर्नुभएको थियो । उक्त विधेयकमाथि सदनमा दफावार छलफल भएको थियो ।
कानुनमन्त्री डा.शिवमाया तुम्बाहाम्फेद्वारा प्रतिनिधि सभामा दफावार छलफलकाे लागि राखिएको निशानछापमा मुलुककाे नयाँ नक्सा प्रतिस्थापन गर्ने प्रस्तावकाे पक्षमा बाेल्ने नेताहरूकाे नामावली निम्न रहेकाे छ ।
प्रतिनिधि सभाकाे ऐतिहासिक र अति नै महत्वपूर्ण विषयमा आआफ्नाे धारणा राख्नेमा सांसदहरू पुष्पकमल दाहाल"प्रचण्ड", शेरबहादुर देउवा, राजेन्द्र महताे, उपेन्द्र यादव, राजेन्द्र लिंदेन, दुर्गा पाैडेल, प्रेम सुवाल, विष्णुप्रसाद पाैडेल, डा. शशांक काेइराला, भीमबहादुर रावल , प्रकाशमान सिहं, पम्फा भुसाल, ज्ञानेन्द्रबहादुर कार्की, गाेकर्णराज विष्ट, देवेन्द्रराज कँडेल, देवेन्द्र पाैडेल, डा.अमरेशकुमार सिंह, गणेशसिंह ठगुन्ना, डा. मीनेन्द्र रिजाल, दिलेन्द्रप्रसाद बडु, उमा रेग्मी, रामबहादुर विष्ट र लालबाबु पण्डित रहेका छन् ।
प्रतिकृया दिनुहोस