जनकपुर । मुख्यमन्त्री अन्तर प्रदेश राष्ट्रिय कबड्डी प्रतियोगित २०८१/०८२ को उपाधि सुदुरपश्चिम प्रदेश टिमले हात पारेको छ ।

जनकपुरधाममा तीन दिनदेखि जारी खेलको फाइनल खेलमा आज मधेश प्रदेश टिम र सुदुरपश्चिम प्रदेशबीच भिडन्त भएको थियो ।

सो क्रममा सुदुरपश्चिम प्रदेशका टिमले ३७ अंक प्राप्त गर्दै मधेश प्रदेशका टिमलाई १ अंकको अन्तरले पराजित गरेको छ । मधेशको टिमले ३६ अंक प्राप्त गरेको थियो ।

आजको अन्तिम खेलको सुरुवात देखि नै राम्रो खेल्दै आएको मधेशको टिमले खेलको अन्तिम मिनेटमा कमजोर प्रदर्शन गरेसंगै सुदुरपश्चिमले मौकाको फाइदा उठाउँदै मधेशको टिमलाई पछाडि पार्न सफल भएको थियो ।

विजेता सुदुरपश्चिमको खेलाडिहरुलाई मधेश प्रदेशका खेलकुद तथा समाज कल्याण मन्त्रालयका सचिव रंजित कुमार यादवले ट्रफि हस्तान्तरण गर्नुका साथै खेलाडीहरुलाई मेडल प्रदान गरेका थिए ।

सचिव यादवले पहिलो पटक भएको यस मुख्यमन्त्री अन्तर प्रदेश राष्ट्रिय कबड्डी प्रतियोगितामा सहभागी भएका सम्पूर्ण खेलाडिहरुको प्रसंशा गर्नुका साथै आगामी दिनमा अझ राम्ररी खेल्न हौसला बढाएका थिए ।