एमाले र एकीकृत समाजवादीका नेता कार्यकर्तावीच निकटता बढ्न थालेको छ । २०८१ चैत १८ गतेपछि कतिपय एमाले र एसका नेताहरुले आइसब्रेक भएको पनि बताइरहेका छन् । २०८१ चैत १८ गते प्रधानमन्त्री केपी ओली वामपन्थी नेता, लेखक तथा कूटनीतिज्ञ स्वर्गीय कमल काेइरालाप्रति श्रद्धाञ्जलि दिन एकीकृत समाजवादीकाे केन्द्रीय कार्यालयमा पुगेपछि आइसब्रेक भएकाे चर्चा गर्न थालिएकाे छ ।
महासचिव पोखरेल एसको कार्यालय गएको पनि पहिलोपटक नै हाे । एमाले अध्यक्ष ओली, महासचिव पोखरेलसहित अन्य नेताहरु पनि एसको कार्यालयमा जान थाल्नुलाई एसका नेताहरुले आइसब्रेक भन्न थालेका छन् ।
यसरी आइसब्रेक नै हुने गरी अन्य ठूलो त्यस्तो घटना भएको त खास बुझिएको छैन तर नेताहरुले सामाजिक सञ्जालमै 'आइसब्रेक' भएको बताइरहेका छन् । एसका नेता प्रकाश ज्वालाले एमाले र एसको विषयलाई लिएर आइब्रेक भएको बताएका छन् ।
वामपन्थी नेता, लेखक तथा कूटनीतिज्ञ कमल कोइरालाको निधनले त्यस्तो सम्बन्ध विस्तार गरेको चर्चा अहिले भइरहेको छ । कोइरालाको निधनपछि एमाले अध्यक्ष केपी ओली एसको तीनकुनेस्थित कार्यालय गएका थिए । एमाले विभाजनपछि पहिलोपटक केपी ओली एसको कार्यालयमा पुगेका हुन् ।
एमाले अध्यक्ष ओलीलगायत एमाले विद्राेही भीम रावल पनि काेइरालाप्रति श्रद्धाञ्जलि दिन उक्त कार्यालयमा पुगेका थिए । अनि, ओली, रावलको साथमा माधव नेपाल र माओवादी केन्द्रका नेता नारायणकाजी श्रेष्ठको संयुक्त फोटो पनि सार्वजनिक भएको थियो । उक्त भेटलाई एसका नेताहरुले आइसब्रेकको रुपमा हेरेका छन् ।
त्यतिमात्र होइन, १५ चैतमा दुर्गा प्रसाईहरुको आन्दोलनका क्रममा एसको कार्यालयमा पनि तोडफोड भएको थियो । उक्त तोडफोडले गर्दा एसको कार्यालयमा भौतिक क्षतिका साथै दस्तावेजहरु पनि जलेर नष्ट भएको छ । उक्त घटनाको भोलिपल्ट १६ चैतमा एमाले महासचिव शंकर पोखरेल पनि एसकाे कार्यालय अवलोकनका लागि गएका थिए ।
महासचिव पोखरेल एसको कार्यालय गएको पनि पहिलोपटक नै हाे । एमाले अध्यक्ष ओली, महासचिव पोखरेलसहित अन्य नेताहरु पनि एसको कार्यालयमा जान थाल्नुलाई एसका नेताहरुले आइसब्रेक भन्न थालेका छन् ।
कतिपय एमाले नेता र एसका नेताले पार्टी एकताको वातावरण बन्न थालेको बताउन थालेका छन् । एसका नेता प्रकाश ज्वालाले आइसब्रेक भनेर सामाजिक सञ्जालमा लेख्नुलाई पनि त्यही अर्थमा हेरिएको छ ।
त्यही १५ चैतको एससहितका दलहरुले गरेको सभालाई पनि एमाले महाचिव शंकर पोखरेलले समर्थन गरेका थिए । चैत १४ गते राति सामाजिक सञ्जालमार्फत नै गणतन्त्रवादीहरुको उक्त सभालाई समर्थन गर्दै लेखेका थिए । माओवादी र एससँग सँधै आक्रमक देखिने पोखरेलको उक्त समर्थनलाई पनि रहस्यमय मानिएको छ ।
अध्यक्ष ओली र महासचिव पोखरेलले एसप्रति निकटता देखाउनुलाई भित्रभित्रै केही खिचडी पाकिरहेको हो कि भन्ने संकेत गरेकाे विश्लेषण पनि राजनीतिक वृत्तमा भइरहेको छ । (तस्बिर : प्रकाश ज्वाला फेसबुक)
प्रतिकृया दिनुहोस