काठमाडौं, २१ चैत । अमेरिकी राष्ट्रपति डोनाल्ड ट्रम्पले भारत चीनलगायत धेरै देशमा पारस्परिक कर लगाउने घोषणा गरेका छन् ।
ट्रम्पको यो ट्यारिफलाई ‘डिस्काउन्टेड रेसिप्रोकल ट्यारिफ’ नाम दिइएको छ । र, ह्वाइट हाउसले ‘डिस्काउन्टेड रेसिप्रोकल ट्यारिफ’ लगाएका करिब १०० देशको सूची सार्वजनिक गरेको छ ।
यसअन्तर्गत अमेरिकामा लगाइएको कर ती देशहरूले अमेरिकामा लगाएको करको आधा वा झण्डै बराबर हुन्छ। तर, यस सूचीमा अमेरिकामा लगाएको जस्तै कर लगाउने देश पनि छन् । यसबाहेक १० प्रतिशत आधारभूत महसुल पनि लगाइएको छ ।
करको घोषणा गर्दै अमेरिकी राष्ट्रपतिले भने, ‘आज त्यो मुक्ति दिवस हो, जसको लागि अमेरिका लामो समयदेखि पर्खिरहेको थियो, आजको दिन अमेरिकी उद्योगको पुनर्जन्म र अमेरिका फेरि समृद्ध हुँदै गएको दिनलाई सम्झिनेछ ।’
ट्रम्पले आफ्नो सम्बोधनमा अमेरिकाको फाइदा विदेशीले उठाएको र ‘लुट’ गरेको बताए । उनले भने, ‘५० वर्षभन्दा बढी समयदेखि हाम्रा करदाता ठगिएका छन्, तर अब त्यस्तो हुने छैन ।’ डोनाल्ड ट्रम्पले एक कार्यकारी आदेशमार्फत यो कर लागू गरेका हुन्।
अमेरिकी समय अनुसार आज राति १२ः०१ बजेबाट लागू हुने गरी विदेशमा उत्पादन हुने सबै अटोमोबाइलमा २५ प्रतिशतको महसुल लगाइएको छ । यस बाहेक अमेरिकी समय अनुसार अप्रिल ५ मा बिहान १२ बजेदेखि सबै देशमा १० प्रतिशतको आधारभूत महशुल लागू हुनेछ । जबकि १० प्रतिशतभन्दा बढी भन्सार शुल्क अमेरिकी समय अनुसार अप्रिल ९ गते बिहान १२ बजेदेखि लागू हुनेछ ।
प्रतिकृया दिनुहोस