काठमाडौँ । मित्रराष्ट्र म्यानमारमा हालै गएको विनाशकारी भूकम्पका कारण भएको व्यापक धनजनको क्षति पश्चात् नेपाल सरकारको निर्णयअनुसार मेडिकल राहत सहित नेपाली सेनाको टोली आज मिति २०८१ चैत्र २० गते त्यसतर्फ प्रस्थान गरेको छ।
प्रमुख सेनानी रामचन्द्र श्रेष्ठको नेतृत्वमा १२ जना चिकित्सकीय टिम, ४ जना बन्दोबस्ती सहायता टिम र ६ जना क्रु मेम्बर सहित कुल २२ सदस्यीय टोली नेपाली सेनाको CN-235 CASA विमानद्वारा म्यानमारतर्फ प्रस्थान गरेको हो।
विभिन्न प्रकारका आवश्यक औषधि तथा उपकरणसहित उक्त टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू संलग्न रहेका छन्। नेपाली सेनाको उक्त टोलीले करिब एक साता म्यानमारको भूकम्प प्रभावित क्षेत्रमा रही घाइतेहरूको स्वास्थ्य उपचारमा खटिनेछ।
नेपाल सरकारले मानवीय सहायता प्रदान गर्ने उद्देश्यले यो टोली पठाएको हो, जसले संकटग्रस्त म्यानमारका नागरिकलाई स्वास्थ्य सेवामार्फत राहत प्रदान गर्नेछ।
प्रतिकृया दिनुहोस