काठमाडौं । सेनाद्वारा सञ्चालित उच्च स्तरीय राष्ट्रिय सुरक्षा तालिम २०८१ चैत १८ गते सोमबार सैनिक कमाण्ड तथा स्टाफ कलेज, शिवपुरीमा समापन भयो। २०८१ चैत्र ०३ गतेदेखि सञ्चालन भएको यो तालिम रक्षा मन्त्रालय र नेपाली सेनाको सहकार्यमा सम्पन्न भएको हो।

समापन समारोहमा प्रमुख अतिथि  रक्षा मन्त्री मानवीर राईले राष्ट्रिय सुरक्षाको महत्त्वबारे प्रकाश पार्दै, नेपालको स्वतन्त्रता, भौगोलिक अखण्डता र राष्ट्रिय एकता जोगाउने आवश्यकता औंल्याए। उनले बहुजातीय, बहुभाषिक, बहुसांस्कृतिक समाजभित्र सहिष्णुता र ऐक्यबद्धता आवश्यक रहेको बताउँदै सुरक्षा प्रणालीलाई थप सशक्त बनाउनुपर्ने धारणा राखे।

प्रधान सेनापति महारथी अशोक राज सिग्देलले सफलतापूर्वक तालिम पूरा गर्ने सहभागीहरूलाई बधाई दिँदै, सुरक्षा क्षेत्रका विभिन्न निकायहरूबीच सहकार्य, समन्वय र साझा धारणा निर्माणमा यस्तो तालिम महत्त्वपूर्ण रहने उल्लेख गरे।

राष्ट्रिय सुरक्षा छलफल र विश्लेषण

तालिमको क्रममा २०८१ चैत्र १४ गते राष्ट्रिय स्तरको उच्च स्तरीय सेमिनार पनि आयोजना गरिएको थियो, जसमा राज्य सञ्चालन, सुशासनका संयन्त्रहरू र नेपालको वर्तमान अवस्था विषयमा गहन छलफल भएको थियो।

विभिन्न क्षेत्रका २९ जना सहभागी

उक्त तालिममा विभिन्न मन्त्रालय, संवैधानिक निकाय, विश्वविद्यालय, सञ्चार क्षेत्र, नेपाली सेना, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका २९ जना अधिकारीहरू सहभागी थिए।

उच्च अधिकारीहरूको उपस्थिति

समापन समारोह सैनिक कमाण्ड तथा स्टाफ कलेजका शिक्षाध्यक्ष उपरथी चोक बहादुर ढकालको स्वागत मन्तव्यबाट सुरु भएको थियो। कार्यक्रममा पूर्व प्रदेश प्रमुख डा. राजेश अहिराज, पूर्व प्रधान सेनापति, विभिन्न मन्त्रालयका सचिवहरू, बलाधिकृत रथी, अन्य सुरक्षा निकायका अधिकारीहरू तथा सञ्चारकर्मीहरू उपस्थित थिए।

राष्ट्रिय सुरक्षाको बलियो जग

यस तालिमले सुरक्षा निकायहरूबीच सहकार्य र समन्वय बढाउनुका साथै, राष्ट्रिय सुरक्षा रणनीति र नीतिहरूको प्रभावकारी कार्यान्वयन गर्न मार्गनिर्देशन गर्ने विश्वास गरिएको छ।