दमौली (तनहुँ), १ मङ्सिरः निर्माणाधीन मुग्लिन–पोखरा सडक योजनाअन्तर्गत तनहुँको मादी नदीमा निर्माण भइरहेको आर्क डिजाइनको पुलको ४५ प्रतिशत काम सकिएको छ। व्यास नगरपालिका ४ र ५ जोड्ने मादी नदीमा निर्माणलाई तीव्रता दिइएको मुग्लिन–पोखरा सडक योजना (पूर्वी खण्ड) ले जानकारी दिएको छ।
आयोजनाका पूर्वी खण्डका इन्जिनियर विष्णुप्रसाद पाण्डेले भनेका छन् कि उक्त पुलको छ वटा ‘स्पान’ हुनेछ। तीन सय १५ मिटर लामो उक्त पुल तीन वर्षभित्र सम्पन्न गर्ने लक्ष्य राखेर निर्माण कम्पनीसँग सन् २०२२ अगष्ट ११ मा रु १ अर्ब २१ करोडमा ठेक्का सम्झौता गरिएको थियो। उक्त पुलको ठेक्का जेडआइएसटी अन्नक जेभीले पाएको हो।
पृथ्वी राजमार्गको सबैभन्दा लामो आर्क डिजाइनको यो पुल चार लेनको हुनेछ। हाल नदीमाथि रहेको दुई लेनको पुल तीन सय ७० मिटर लामो छ। सोही पुलभन्दा करिब ५० मिटरको दूरीमा नयाँ पुल निर्माण भइरहेको छ।
निर्माण कम्पनीका प्रतिनिधि दिनेश श्रेष्ठले अहिलेकै गतिमा काम अगाडि बढे समयभन्दा अगाडि नै पुल सम्पन्न हुने विश्वास व्यक्त गरे। पुल निर्माणका लागि राति र दिउँसो दुई ‘सिफ्ट’मा काम भइरहेको छ।
मुग्लिन–पोखरा सडक योजनाको पूर्वी खण्डअन्तर्गत आँबुखैरेनीदेखि जामुनेसम्म १३ वटा पुल निर्माण सम्पन्न भइसकेका छन्। ठूला पुलमध्ये दमौलीको मादी नदी, बुल्दी खोला, बन्दीपुरको नाला र आँबुखैरेनीको खानी खोला लगायतका स्थानमा पुल निर्माण जारी छ।
पूर्वी खण्डअन्तर्गत सडकको काम भने ६८ प्रतिशत सकिएको छ। पूर्वी खण्डमा विसं २०७७ माघ १७ गते सम्झौता भई २०७८ वैशाख २ गतेदेखि काम सुरु गरिएको हो। पूर्वी खण्डको ठेक्का चाइना कम्युनिकेशन कन्स्ट्रक्सनले पाएको छ।
विसं २०२६ मा रेखाङ्कन गरिएको सडकमा सवारीको चाप बढ्दै गएपछि एसियाली विकास बैंक (एडिबी)को ऋण सहयोगमा सडकलाई चार लेनको बनाउन लागिएको हो। पूर्वी खण्डको ठेक्का रु ६ अर्ब २१ करोड ३१ लाख १३ हजारमा र पश्चिम खण्डको ठेक्का रु ७ अर्ब ४० करोड ४६ लाखमा लागेको छ।
प्रतिकृया दिनुहोस