काठमाडौँ, २० असोज । प्रमुख सत्तारुढ दल नेपाली काँग्रेसको नेतृत्वमा बनेको बृहत् लोकतान्त्रिक गठबन्धनको कार्यदलमा रहने सदस्यहरुको नाम टुंगो लागेको खबर छ । कार्यदलमा आठ सदस्य परेकाले ८/१२ को अपसकुन लाग्ने भयो भन्ने टिप्पणी पनि हुन थालेको छ।
आगामी निर्वाचनमा चुनावी तालमेल गर्ने सम्बन्धमा असोज १८ गते बुधबार काँग्रेससहित छ दलले लोकतन्त्र, राष्ट्रवादी र परिवर्तन पक्षधर शक्तिहरुको गठबन्धन बनाउन कार्यदल गठन गर्ने निर्णय गरेका थिए ।
आवश्यक गृहकार्य गर्न बनेको कार्यदलमा काँग्रेसबाट नेताहरु विमलेन्द्र निधि, पूर्णबहादुर खड्का र डा मीनेन्द्र रिजाल, राष्ट्रिय प्रजातन्त्र पार्टीबाट बुद्धिमान तामाङ, राप्रपा(प्रजातान्त्रिक) बाट विक्रम पाण्डे रहेका छन्।
त्यस्तै संघीय समाजवादी फोरम नेपालबाट रामसहाय यादव, राष्ट्रिय जनता पार्टी नेपालबाट सर्वेन्द्रनाथ शुक्ल र नेपाल लोकतान्त्रिक फोरमबाट रामजनम चौधरी रहेका छन् । कार्यदलको बैठक असोज २० गते शुक्रबार बिहान ८ः०० बजे बस्ने नेता डा रिजालले जानकारी दिएका छन् ।
नेकपा (एमाले), नेकपा (माओवादी केन्द्र) र नयाँशक्ति पार्टीबीच असोज १७ गते मंगलबार चुनावी गठबन्धन र पार्टी एकताको पहलका लागि सहमति भएपछि काँग्रेसको नेतृत्वमा छ दलले आगामी निर्वाचनमा लोकतन्त्र पक्षधर शक्तिको गठबन्धन बनाउन कार्यदल गठन गर्ने निर्णय गरेको थियो ।
–––
