लमजुङ, १९ असाेज । मनाङमा भिरबाट खसेर अमेरिकन नागरिकको मृत्यु भएको छ । मृत्यु हुनेमा अमेरिका घर भएका राहदानी नं. ६८१७४२५ का ६९ बर्षीय पुरुष चाल्स केथ डेभिज रहेका छन् ।
उनी असाेज १७ गते बुधबार श्रीमती वेथ एन फोड्रियत, गाईड, चालक र पोटर सहित बा ६ च ७५६ नम्बरको ल्याण्ड क्रुजर गाडीमा लमजुङबाट मनाङ सदरमुकाम चामे जाँदै थिए ।
बेसीशहर-चामे सडकखण्ड अन्तर्गत मनाङको नासोँ गापा-३ खोत्रोडाँडाबाट सडकमा झरेको ढुङ्गा पन्छाउने क्रममा राति करिब १० बजे उनी सडकबाट करिब सय मिटर तल मर्स्याङ्दी नदी किनारमा खसेको प्रहरीले जनाएको छ ।
जिल्ला प्रहरी कार्यालय चामे र इलाका प्रहरी कार्यालय धारापानीबाट खटिएको प्रहरी टोलीले उनलाई राति सवा १ बजे उद्धार गरी उपचारका लागि मनाङ जिल्ला अस्पताल चामे लगिएको थियो ।
१८ गते विहान करिब ३ बजे अस्पताल लगिएकोमा अस्पतालका डाक्टरले सवा ३ बजे उनको मृत घोषणा गरेको जिल्ला प्रहरी कार्यालय मनाङका सूचना अधिकारी इन्सपेक्टर पुष्कर कार्कीले जानकारी दिए ।
डेभिजको शवलाई पेष्टमार्टमको लागि एयर डाइनेस्टिक हेलिकप्टरमार्फत असाेज १८ गते बिहीबार दिउँसो सवा ३ बजे टिचिङ अस्पताल काठमाडौं लगिएको छ ।
