रुपन्देही । रुपन्देहीको देवदहमा पेस्तोलबाट गोली प्रहार हुँदा एक युवक घाइते भएका छन्। घटनापछि प्रहरीले गोली प्रहार गरेको आरोप लागेका व्यक्तिसहित तीन जनालाई नियन्त्रणमा लिएर अनुसन्धान अघि बढाएको छ।
जिल्ला प्रहरी कार्यालय रुपन्देहीका अनुसार २०८३ असोज १७ गते दिउँसो करिब ३ः४५ बजे देवदह नगरपालिका–५ का ४२ वर्षीय दीपक खरेल भन्ने दुर्गाप्रसाद खरेलले पेस्तोलबाट एक राउन्ड गोली प्रहार गरेका थिए।
गोली लागेर बुटवल उपमहानगरपालिका–९ मिलनचोक बस्ने २२ वर्षीय रायन खत्री क्षेत्री घाइते भएका छन्। उनको दाहिने गालाको छाला खोस्रिएर घाँटीमा चोट लागेको प्रहरीले जनाएको छ। घाइते क्षेत्रीको भलुहीस्थित देवदह मेडिकल कलेजमा उपचार भइरहेको छ।
घटनाको जानकारीपछि प्रहरी चौकी खैरेनीबाट खटिएको टोलीले खरेललाई पेस्तोल र दुई राउन्ड गोलीसहित नियन्त्रणमा लिएको हो। प्रहरीले घटनाको अनुसन्धानका क्रममा अन्य दुई जनालाई पनि पक्राउ गरेको छ।
पक्राउ पर्नेमा देवदह नगरपालिका–५ का ३८ वर्षीय कमल शर्मा र सोही वडाका १८ वर्षीय अमृत खरेल रहेका छन्। उनीहरूको घटनामा रहेको भूमिकाबारे विज्ञप्तिमा विस्तृत विवरण खुलाइएको छैन।
प्रहरीले बरामद सामग्रीमा एक थान पेस्तोल र त्यसमा प्रयोग हुने दुई राउन्ड गोली रहेको जनाएको छ। जिल्ला प्रहरी कार्यालयले सार्वजनिक गरेको तस्बिरमा पेस्तोल, म्यागजिन र दुई थान गोली देखिन्छन्।
गोली प्रहार गर्नुको कारण र घटनाअघिको परिस्थितिबारे प्रहरीले थप विवरण सार्वजनिक गरेको छैन। पक्राउ परेका तीनै जनालाई नियन्त्रणमा राखेर घटनासम्बन्धी थप अनुसन्धान भइरहेको जिल्ला प्रहरी कार्यालय रुपन्देहीले असोज १८ गते जारी गरेको विज्ञप्तिमा उल्लेख छ।
