काठमाडौं । नेपाली कांग्रेसको १५औँ महाधिवेशनका लागि सिँगारिँदै गरेको काठमाडौंको खुलामञ्चमा बिहानैदेखि नेता, कार्यकर्ता तथा प्रतिनिधिहरूको चहलपहल बढेको छ। आज २०८३ असाेज १८ गतेबाट सुरू हुने महाधिवेशनमा सहभागी हुन आइपुगेकाहरूबीच भेटघाट, शुभकामना आदानप्रदान र सामूहिक तस्बिर खिचाउने क्रमले महाधिवेशन स्थलमा रौनक थपेको छ।
महाधिवेशनस्थलमा पुगेका नेता तथा कार्यकर्ता विभिन्न समूहमा उभिएर मोबाइल र क्यामेरामा तस्बिर कैद गर्न व्यस्त देखिएका छन्। कोही साथीहरूसँग सेल्फी खिचिरहेका छन् भने कोही नेताहरूसँग उभिएर महाधिवेशनको सम्झना सुरक्षित गरिरहेका छन्। तस्बिर खिचाउने पालो पर्खिने र एकअर्काको तस्बिर खिचिदिने सहभागीहरूको सक्रियताले खुलामञ्चको वातावरण उत्साहपूर्ण बनेको छ।
लामो समयपछि भेट भएका नेता–कार्यकर्ताबीच सञ्चोबिसञ्चो सोध्ने र शुभकामना साटासाट गर्ने क्रम पनि चलिरहेको छ। महाधिवेशनमा सहभागी हुन आएका प्रतिनिधिहरूका लागि खुलामञ्च पार्टीको जमघटसँगै पुराना सम्बन्ध नवीकरण गर्ने थलो बनेको देखिन्छ।
सहभागीहरूको आगमनसँगै महाधिवेशनस्थल सिँगार्ने काम पनि अघि बढिरहेको छ। खुलामञ्चलाई महाधिवेशनको स्वरूप दिने तयारी र त्यहाँ बढिरहेको चहलपहलले राजनीतिक जमघटको माहोल बनाएको छ। तयारी भइरहेका दृश्यलाई समेत सहभागीहरूले मोबाइलमा कैद गरिरहेका छन्।
स्थलका विभिन्न भागमा साना–ठूला समूहमा भेला भएका कार्यकर्ताहरू आपसी कुराकानीमा व्यस्त छन्। भेटघाटपछि सामूहिक तस्बिर खिचाउने र अर्को समूहसँग मिसिने क्रम निरन्तर देखिन्छ। बिहानैदेखिको उपस्थितिले महाधिवेशनप्रति सहभागीहरूको उत्साह झल्काएको छ।
कांग्रेसको आगामी नेतृत्व र संगठनको दिशासँग जोडिएको महाधिवेशनस्थलमा अहिले भने भेटघाट र ‘फोटो सेसन’का दृश्यले ध्यान तानेका छन्। सिँगारिँदै गरेको खुलामञ्चमा नेता, कार्यकर्ता र प्रतिनिधिहरूले खिचाएका तस्बिरले महाधिवेशनको प्रारम्भिक माहोल समेटेका छन्।
