काठमाडौं, असोज १६ । जटिल प्रसूति समस्या देखिएपछि हुम्लाको सर्केगाड गाउँपालिका–३ निवासी २६ वर्षीया महिलालाई नेपाली सेनाको हवाई साधनमार्फत उद्धार गरी सुर्खेत पुर्याइएको छ ।
असोज १५ गते उनलाई थप उपचारका लागि सुर्खेत लगिएको हो । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयले राष्ट्रिय महिला सशक्तीकरण परियोजनाअन्तर्गत सञ्चालन गरेको गर्भवती तथा सुत्केरी महिलाको हवाई उद्धार कार्यक्रममार्फत उनको उद्धार गरिएको हो ।
प्रसूति जटिलताका कारण थप उपचार आवश्यक भएपछि मन्त्रालयको कार्यक्रमअन्तर्गत नेपाली सेनाको हवाई साधन परिचालन गरिएको थियो । उक्त कार्यक्रमले दुर्गम क्षेत्रमा जटिल स्वास्थ्य अवस्थामा रहेका गर्भवती तथा सुत्केरी महिलालाई उपचारस्थलसम्म पुर्याउन सहयोग गर्दै आएको छ ।
उद्धार गरिएकी महिलाको नाम, प्रसूति जटिलताको विस्तृत विवरण तथा उपचारपछिको स्वास्थ्य अवस्थाबारे जानकारी उपलब्ध भएको छैन ।
