मनाङ । मनाङको नार्पाभूमि गाउँपालिका-५ स्थित हिम्लुङ हिमालमा २०८३ असाेज ११ गते आइतबार गएको विनाशकारी हिमपहिरोमा परी बेपत्ता भएकामध्ये फेला परेका आठ जनाको शव नेपाली सेनाको हवाई साधनबाट ल्याइएको छ।
नेपाली सेनाले दिएको जानकारीअनुसार, २०८३ असोज १५ गते शव उद्धार गर्ने क्रममा दुई वटा शव सदरमुकाम चामे र अन्य छ वटा शव फूगाउँसम्म ल्याइएको हो। हिमाली क्षेत्रबाट शव तल ल्याउन सेनाले हवाई साधन परिचालन गरेको थियो।
हिमपहिरोपछि बेपत्ता भएकाहरूको खोजीका क्रममा फेला परेका शव सम्बन्धित स्थानसम्म पुर्याइएको सेनाले जनाएको छ। दुर्गम हिमाली क्षेत्रमा भएको घटनापछि खोजी तथा उद्धारमा हवाई साधनको सहयोग लिइएको हो।
सेनाले सार्वजनिक गरेको विवरणमा आठ जनाको शव ल्याइएको उल्लेख भए पनि उनीहरूको परिचय खुलाइएको छैन। शवको पहिचान, आफन्तलाई बुझाउने प्रक्रिया तथा अन्य बेपत्ता व्यक्तिको खोजीको पछिल्लो अवस्थाबारे पनि उक्त विवरणमा जानकारी दिइएको छैन।
(तस्बिर : नेपाली सेना, संयाेजन साँघु न्यूज डटकम)
