सिरहा, १५ असोज। सशस्त्र प्रहरी बलले सिरहाको सुखीपुर नगरपालिका–१० स्थित विश्वकर्मा चोक, गागन खोला पुलबाट एक हजार १०२ किलो ६५५ ग्राम गाँजासहित बोलेरो गाडी र मोटरसाइकल नियन्त्रणमा लिएको छ।
गएराति करिब १ बजे सशस्त्र प्रहरी बल नेपाल नं. ७ गणअन्तर्गत सुरक्षा बेस गोलबजार र सुरक्षा बेस सुखीपुरको संयुक्त टोलीले उक्त गाँजा बरामद गरेको सशस्त्र प्रहरी बलका सहप्रवक्ता एवं प्रहरी नायब उपरीक्षक शैलेन्द्र थापाले जानकारी दिए।
टोलीले बा १४ च २९४ नम्बरको बोलेरो गाडी र स ६ प ४८५९ नम्बरको मोटरसाइकल नियन्त्रणमा लिएको हो। बरामद गाँजा २६ वटा बोरामा प्याक गरिएको अवस्थामा भेटिएको थियो।
सशस्त्र प्रहरीका अनुसार चालकहरू गाडी र मोटरसाइकल छाडेर फरार भएका छन्।
बरामद गाँजा तथा नियन्त्रणमा लिइएका सवारीसाधन आवश्यक कारबाहीका लागि सम्बन्धित निकायमा बुझाउने प्रक्रिया अघि बढाइएको सहप्रवक्ता थापाले बताए।
