काठमाडौं । रुसमा आयोजित अन्तर्राष्ट्रिय सिर्जनशील उद्योग संवादमा बटरफ्लाइ फिल्म्सले नेपालको प्रतिनिधित्व गरेको छ। यो सहभागिताले विकसित हुँदै गएको नेपाली फिल्म उद्योगलाई अन्तर्राष्ट्रिय बजारसँग जोड्नुका साथै विभिन्न देशका फिल्म उद्योगका प्रतिनिधिसँग सहकार्य र साझेदारीका सम्भावनाबारे संवाद गर्ने अवसर प्रदान गरेको कम्पनीले जनाएको छ।
रुसको येकातेरिनबर्गमा आयोजित कार्यक्रममा रुस, भारत, दक्षिण कोरिया, चीन, टर्की र नेपालका फिल्म उद्योगसम्बद्ध प्रतिनिधि तथा प्रतिनिधिमण्डलको सहभागिता थियो। कार्यक्रममा अन्तर्राष्ट्रिय सहकार्य विस्तार, सह–निर्माण (को–प्रोडक्सन) का सम्भावना, विभिन्न देशका फिल्म बजारबीच साझेदारी तथा राष्ट्रिय सीमाभन्दा बाहिर फिल्म र फिल्मकर्मीलाई दर्शकमाझ पुर्याउने उपायबारे छलफल भएको थियो।
नेपालको प्रतिनिधित्व गर्दै बटरफ्लाइ फिल्म्सका प्रमुख कार्यकारी अधिकृत (सीईओ) सृजन श्रेष्ठ प्यानल छलफलमा सहभागी भएका थिए। उनले नेपालमा फिल्म प्रदर्शनको अवस्था, फिल्म उद्योगको समग्र संरचना तथा नेपाली चलचित्र क्षेत्रमा रहेका सम्भावनाबारे प्रस्तुति दिएका थिए।
श्रेष्ठले नेपाली फिल्मको बढ्दो सम्भावनाका साथै नेपाललाई अन्तर्राष्ट्रिय फिल्म निर्माणका लागि आकर्षक गन्तव्य बनाउने विशिष्ट पक्षबारे प्रकाश पारेका थिए। नेपालको प्राकृतिक तथा भौगोलिक विविधता, सांस्कृतिक पहिचान, विश्वभर फैलिएको नेपाली डायस्पोरा र मौलिक कथावाचनलाई अन्तर्राष्ट्रिय सहकार्यका लागि उपयोग गर्न सकिने उनको धारणा थियो।
अन्तर्राष्ट्रिय सहकार्य अघि बढाउँदा नेपाली फिल्मको मौलिकता र राष्ट्रिय पहिचान भने कायम राख्नुपर्नेमा उनले जोड दिएका थिए।
कार्यक्रममा अन्तर्राष्ट्रिय सहकार्यलाई व्यावसायिक फिल्ममा मात्र सीमित नराखी स्वतन्त्र फिल्मकर्मी, नयाँ पुस्ताका प्रतिभा, निर्माता तथा अन्य सिर्जनशील क्षेत्रका व्यक्तिलाई समेत अन्तर्राष्ट्रिय सञ्जालमा जोड्नुपर्ने विषयमा छलफल भएको थियो। प्रतिभा आदानप्रदान, सह–निर्माण, ज्ञान तथा अनुभवको आदानप्रदान र नयाँ वितरण प्रणालीमा पहुँच विस्तार गर्न सकिने सम्भावनाबारे पनि सहभागीबीच विचारविमर्श भएको थियो।
येकातेरिनबर्गमा भएको संवादले नेपाल र अन्तर्राष्ट्रिय फिल्म बजारबीच आगामी दिनमा थप सहकार्य गर्ने आधार तयार गरेको बटरफ्लाइ फिल्म्सले जनाएको छ। कुनै एउटा फिल्मको प्रदर्शन वा वितरणमा मात्र सीमित नभई दीर्घकालीन र दिगो सम्बन्ध निर्माणमा जोड दिइएको कम्पनीको भनाइ छ।
बटरफ्लाइ फिल्म्सकी प्रबन्ध निर्देशक जेनिशा पहारी (श्रेष्ठ) ले पनि अन्तर्राष्ट्रिय फिल्म उद्योगसँग संवाद र साझेदारी विस्तारका लागि निरन्तर पहल गर्दै आएकी छन्। नेपाली फिल्म तथा फिल्मकर्मीलाई अन्तर्राष्ट्रिय बजारमा थप परिचित गराउने उद्देश्यले उनले विभिन्न अन्तर्राष्ट्रिय सरोकारवालासँग सहकार्यका सम्भावनाबारे संवाद अघि बढाउँदै आएको कम्पनीले जनाएको छ।
उनको पहलले नेपाललाई फिल्म वितरण, सह–निर्माण, प्रतिभा आदानप्रदान तथा सीमापार सिर्जनात्मक सहकार्यका लागि सम्भावित साझेदारका रूपमा अन्तर्राष्ट्रिय फिल्म बजारमा प्रस्तुत गर्न सहयोग पुगेको बटरफ्लाइ फिल्म्सको दाबी छ।
रुसको अन्तर्राष्ट्रिय सिर्जनशील उद्योग संवादमा भएको सहभागिताले नेपाली फिल्म उद्योगसँग अन्तर्राष्ट्रिय फिल्म पारिस्थितिक प्रणालीमा अझ सक्रिय रूपमा जोडिने पर्याप्त सम्भावना रहेको देखाएको कम्पनीले जनाएको छ। उक्त संवाद नेपाली कथालाई अन्तर्राष्ट्रिय दर्शकमाझ पुर्याउन र अन्तर्राष्ट्रिय फिल्मलाई नेपाली बजारसँग जोड्ने दिशामा अर्को महत्त्वपूर्ण कदम भएको कम्पनीको भनाइ छ।
बटरफ्लाइ फिल्म्सले आगामी दिनमा पनि अन्तर्राष्ट्रिय फिल्म बजारसँगको संवादलाई निरन्तरता दिँदै नेपाल र विश्वका विभिन्न देशका चलचित्र उद्योगबीच अर्थपूर्ण साझेदारी तथा सहकार्य विकास गर्ने जनाएको छ।
