काठमाडौं । संयुक्त राष्ट्रसंघको शान्ति मिसनअन्तर्गत कार्यरत उरुग्वेका शान्ति सैनिकहरूले सुरक्षा अवस्थाको निगरानी, तनावको रोकथाम तथा शान्ति प्रवर्द्धनका लागि नियमित गस्तीलाई निरन्तरता दिएका छन्।
संयुक्त राष्ट्रसंघीय युद्धविराम पर्यवेक्षण बल (यूएनडीओएफ)मा कार्यरत उरुग्वेली शान्ति सैनिकहरूले मिसनको कार्यादेश कार्यान्वयनमा सहयोग पुर्याउन ‘एरिया अफ सेपरेसन’ अर्थात् पृथकीकरण क्षेत्रमा अस्थायी निगरानी चौकी स्थापना गर्नुका साथै नियमित गस्ती सञ्चालन गरिरहेका हुन्।
मिसनका अनुसार संसारका विभिन्न मुलुकबाट खटिएका शान्ति सैनिकहरूले दैनिक रूपमा संवेदनशील क्षेत्रमा गस्ती गर्दै सुरक्षा अवस्थाको अनुगमन गर्छन्। उनीहरूको उपस्थितिले सम्भावित तनाव रोक्न, जमिनमा विकसित घटनाक्रमको वस्तुगत जानकारी सङ्कलन गर्न तथा शान्ति र स्थिरता कायम राख्न सहयोग पुर्याउँदै आएको छ।
उरुग्वेली शान्ति सैनिकले सञ्चालन गर्ने अस्थायी निगरानी चौकी र गस्ती गतिविधिले सम्बन्धित क्षेत्रको वास्तविक अवस्थाबारे मिसनलाई तत्काल जानकारी प्राप्त गर्न मद्दत गर्ने जनाइएको छ। यसबाट घटनाक्रमको अवलोकन तथा प्रतिवेदन तयार गर्ने यूएनडीओएफको क्षमता थप प्रभावकारी बन्ने विश्वास गरिएको छ।
निरन्तर निगरानी, समयमै सूचना तथा प्रतिवेदन प्रवाह र उच्च परिचालन तयारीमार्फत शान्ति सैनिकहरूले आफ्नो जिम्मेवारी निर्वाह गरिरहेका छन्। उनीहरूको गतिविधिले मिसनको कार्यक्षेत्रभित्र सुरक्षा र स्थिरता कायम राख्नसमेत महत्वपूर्ण योगदान पुर्याएको यूएनडीओएफले जनाएको छ।
शान्ति सैनिकहरू ‘डिसइन्गेजमेन्ट अफ फोर्सेस एग्रिमेन्ट’ अर्थात् सेना अलग गर्ने सम्झौताको कार्यान्वयनमा सहयोग गर्न प्रतिबद्ध रहेको बताइएको छ। उक्त सम्झौताअनुसारको अवस्था कायम रहे-नरहेको अनुगमन गर्नु, उल्लंघन वा सम्भावित तनावबारे समयमै प्रतिवेदन दिनु र सम्बन्धित क्षेत्रमा स्थिरता कायम राख्न सहयोग गर्नु मिसनको प्रमुख जिम्मेवारी हो।
-(3)2025-04-21-11-04-23.jpeg)
