पोखरा । कास्की प्रहरीले पोखराका विभिन्न स्थानमा सञ्चालन गरेको ‘स्वीप अप्रेसन’का क्रममा अवाञ्छित गतिविधिमा संलग्न रहेको आरोपमा थप २० जनालाई नियन्त्रणमा लिएको छ।
जिल्ला प्रहरी कार्यालय कास्की तथा मातहतका प्रहरी कार्यालयबाट संयुक्त रूपमा खटिएको प्रहरी टोलीले २०८३ साउन २२ गते राति पोखरा महानगरपालिकाका विभिन्न क्षेत्रमा विशेष निगरानी तथा जाँच अभियान सञ्चालन गरेको थियो।
प्रहरीका अनुसार पोखराको पृथ्वीचोक, सभागृहचोक, सृजनाचोक र पर्यटकीय क्षेत्र लेकसाइडमा गरिएको अप्रेसनका क्रममा मादक पदार्थ सेवन गरी होहल्ला गर्ने, गाँजा तथा अन्य लागुऔषध सेवन गर्ने, सार्वजनिक स्थानमा अवाञ्छित गतिविधि गर्ने तथा सर्वसाधारण एवं पर्यटकलाई अनावश्यक हैरानी दिने कार्यमा संलग्न व्यक्तिहरूलाई नियन्त्रणमा लिइएको हो।
रातको समयमा सार्वजनिक शान्ति–सुरक्षा कायम गर्न, अपराधजन्य गतिविधि नियन्त्रण गर्न र स्थानीयवासी तथा पर्यटकलाई सुरक्षित वातावरण प्रदान गर्ने उद्देश्यले अप्रेसन सञ्चालन गरिएको जिल्ला प्रहरी कार्यालय कास्कीले जनाएको छ।
पर्यटकीय सहर पोखरामा रातको समयमा मानिसको चहलपहल बढी हुने पृथ्वीचोक, बसपार्क आसपास, सभागृहचोक, सृजनाचोक तथा लेकसाइड क्षेत्रमा प्रहरीले निगरानी बढाएको हो। अप्रेसनका क्रममा शंकास्पद रूपमा हिँडडुल गर्ने तथा सार्वजनिक स्थानमा असामान्य गतिविधि गर्ने व्यक्तिहरूमाथि चेकजाँच गरिएको थियो।
चेकजाँचका क्रममा मादक पदार्थ सेवन गरी होहल्ला गर्ने, सामाजिक मर्यादा र सार्वजनिक शान्तिमा असर पुग्ने गतिविधि गर्ने तथा गाँजा एवं लागुऔषध सेवन गरेको अवस्थामा फेला परेका व्यक्तिहरूलाई प्रहरीले नियन्त्रणमा लिएको जनाएको छ।
सर्वसाधारण र स्वदेशी तथा विदेशी पर्यटकलाई बाटोमा रोकेर अनावश्यक हैरानी दिने तथा असुरक्षाको अवस्था सिर्जना गर्न सक्ने गतिविधिमा संलग्न व्यक्तिहरूमाथि पनि कारबाही अघि बढाइएको छ।
प्रहरीले नियन्त्रणमा लिइएका २० जनाको नाम र ठेगाना भने सार्वजनिक गरेको छैन। उनीहरूको गतिविधि, संलग्नता तथा सम्भावित आपराधिक पृष्ठभूमिबारे सोधपुछ र अनुसन्धान भइरहेको जनाइएको छ।
नियन्त्रणमा लिइएकाहरूले गरेको गतिविधिको प्रकृतिअनुसार प्रचलित कानुनबमोजिम कारबाही प्रक्रिया अगाडि बढाइने प्रहरीले जनाएको छ। थप अनुसन्धानपछि कसुर पुष्टि भएका व्यक्तिमाथि कानुनी कारबाही हुने र सामान्य अवस्थामा भेटिएकाहरूको हकमा आवश्यक प्रक्रिया पूरा गरिने बताइएको छ।
कास्की प्रहरीले पोखराको शान्ति–सुरक्षा सुदृढ बनाउन पछिल्लो समय रातिको समयमा निगरानी, गस्ती, आकस्मिक चेकजाँच तथा विशेष अप्रेसनलाई निरन्तरता दिँदै आएको छ। मानिसको बढी भीडभाड हुने चोक, बसपार्क, होटल तथा रात्रिकालीन व्यवसाय सञ्चालन हुने क्षेत्रलाई प्राथमिकतामा राखेर प्रहरी परिचालन गरिएको हो।
पर्यटकीय क्षेत्र लेकसाइडमा स्वदेशी तथा विदेशी पर्यटकको आवागमन बढी हुने भएकाले उनीहरूलाई दुर्व्यवहार, हैरानी वा ठगी हुन नदिन विशेष निगरानी गरिएको प्रहरीले जनाएको छ।
रात्रिकालीन समयमा हुन सक्ने झैझगडा, चोरी, लुटपाट, लागुऔषध कारोबार तथा अन्य अवाञ्छित गतिविधि रोक्न यस्ता अप्रेसन प्रभावकारी हुने प्रहरीको विश्वास छ। सार्वजनिक स्थानमा शान्ति भंग गर्ने र सर्वसाधारणलाई त्रसित बनाउने गतिविधि नियन्त्रण गर्न अप्रेसनलाई निरन्तरता दिइने बताइएको छ।
नियन्त्रणमा लिइएका २० जनामाथि थप अनुसन्धान प्रक्रिया अघि बढाइएको जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक वीरेन्द्रकुमार पासवानले जानकारी दिएका छन्।
