झापा, १९ साउन । सशस्त्र प्रहरी बल र नेपाल प्रहरीको संयुक्त टोलीले झापाको मेचीनगर नगरपालिकास्थित एक घरबाट झण्डै २५ लाख रुपैयाँ मूल्यबराबरका भन्सार छलीका सामान बरामद गरेको छ।
विशेष सूचनाका आधारमा सशस्त्र प्रहरी बल, नेपाल सीमा सुरक्षा गुल्म काँकडभिट्टा र नेपाल प्रहरीको संयुक्त टोलीले २०८३ साउन १९ गते मेचीनगर नगरपालिका-७ स्थित एक घरमा खानतलासी गरेको थियो। त्यस क्रममा भन्सार छली गरी अवैध रूपमा ल्याएर भण्डारण गरिएका कपडा, मोटर पार्ट्स तथा विभिन्न प्रकारका इलेक्ट्रोनिक्स सामान फेला परेका हुन्।
सुरक्षा टोलीका अनुसार बरामद सामानको प्रारम्भिक अनुमानित बजार मूल्य २४ लाख ७९ हजार रुपैयाँ रहेको छ। आवश्यक कानुनी प्रक्रिया पूरा गरी ती सामान थप अनुसन्धान तथा कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ।
नेपाल-भारत खुला सीमाको फाइदा उठाउँदै भन्सार नतिरी विभिन्न सामान भित्र्याएर घर तथा गोदाममा भण्डारण गर्ने गरिएको सूचनाका आधारमा सीमावर्ती क्षेत्रमा निगरानी र गस्ती तीव्र पारिएको सुरक्षा निकायले जनाएको छ।
यस्ता गतिविधिले सरकारी राजस्वमा क्षति पुग्नुका साथै वैधानिक रूपमा कारोबार गर्ने व्यवसायीलाई समेत प्रतिकूल असर पार्ने गर्दछ। भन्सार छली तथा अवैध ओसारपसार नियन्त्रण गर्न सीमा क्षेत्रमा संयुक्त गस्ती, सवारीसाधन जाँच र शंकास्पद स्थानमा निगरानी जारी राखिएको जनाइएको छ।
बरामद सामान कसले र कुन नाकाबाट भित्र्याएको हो तथा भण्डारणमा संलग्न व्यक्तिको पहिचान र भूमिकाबारे सम्बन्धित निकायबाट थप अनुसन्धान भइरहेको छ।
