काठमाडौं । टंक बुढाथोकीको निर्देशनमा निर्माण हुन लागेको नेपाली फिल्म ‘मन बिनाको धन–२’ मा सेलिब्रेटी हेयरस्टाइलिसका रुपमा परिचित राम ठाकुर जोडिएका छन् । संगीतकार तथा गायक टंक बुढाथोकीले हेयरस्टाइलिसका रुपमा रामलाई स्वागत गर्दै सम्झौता गरेका हुन् ।
टंकले लामो समयदेखि आफ्नो फिल्म तथा म्युजिक भिडिओमा रामले हेयर स्टाइलिङ विभागको नेतृत्व गरिरहेको समेत जनाएका छन् ।
उनले भने, ‘मैले रामजीसँग लामो समयदेखि काम गरिरहेको छु । मेरा फिल्म र भिडिओ मात्र होइन, मेरो हेयरस्टाइलिस पनि उहाँ नै हुनहुन्छ । एक पटक पुनः फिल्मको हेयर विभागको जिम्मा दिन पाउँदा म हर्षित छु । उनले गरेको कामको प्रसंसा हुनेछ, साथै उनले फिल्ममा अभिनय पनि गर्दैछन् ।’
उनले रामले गर्ने कामको तारिफमा आफ्ना शब्दहरू खर्चिए । रामले पनि व्यक्ति हुँदै भिडिओ र फिल्ममा जोडिन पाउँदा खुसी लागेको बताए ।
‘टंकसरसँग उहाँको हेयर स्टाइलिङ गर्ने क्रममा जोडिएको थिएँ । विस्तारै उहाँको म्युजिक भिडिओ र फिल्ममा काम गर्ने अवसर पाएँ । पुनः उहाँले दिनुभएको अवसरमा सक्दो मेहनत गर्नेछु’, उनले भने ।
रामले यसअघि पनि केही फिल्ममा समेत अभिनय गरेका छन् । उनी अभिनेता राजेश हमाल र निखिल उप्रेतीको हेयरस्टाइलिसका रुपमा परिचित छन् । उनले यी दुवै अभिनेतासँग दुई दशक बढी समयदेखि काम गरिरहेका छन् । यसका साथै उनले स्वदेशी तथा विदेशी चर्चित कलाकारहरूको समेत हेयर र मेकअप विभागमा रहेर काम गरेका छन् ।
उनले केही समयदेखि कोटेश्वरमा दुई आउटलेटसमेत संचालन गरिरहेका छन्, जहाँ सर्वसाधारणले समेत सेवा लिने गरेका छन् । उक्त फिल्ममा सरोज खनाल, गौरी मल्ल, विपिन कार्की, पूजा शर्मा, महेश त्रिपाठी, किरण केसी, प्रकाश घिमिरे, शंकर श्रेष्ठलगायत कलाकारको अभिनय रहनेछ ।
टंक बुढाथोकी प्रोडक्सनको ब्यानरमा निर्माण हुने फिल्मको कथा निर्देशक टंक बुढाथोकी स्वयंले तयार पारेका हुन् । पटकथा तथा संवाद शिवम् अधिकारीले लेखेका छन् भने गीतसंगीतको जिम्मेवारी पनि बुढाथोकीकै रहनेछ ।
फिल्मको निर्माण विष्णुमाया मैनाली बुढाथोकीले गर्दैछिन् । निर्माण टिमका अनुसार फिल्मको छायाङ्कन भदौको पहिलो सातादेखि सुरु हुनेछ । काठमाडौं उपत्यकाका विभिन्न स्थानका साथै मुस्ताङमा पनि फिल्मको मुख्य छायाङ्कन गरिनेछ ।
स्रोत: Nepal News Bank
