बारा । नेपाल–भारत खुला सीमाको फाइदा उठाउँदै भन्सार छली गरी सामान नेपाल भित्र्याउने क्रम रोकिएको छैन । बाराको सिम्रौनगढ क्षेत्रमा प्रहरीले ई–रिक्साभित्र लुकाएर ल्याइएको ब्याट्री, इन्भर्टर तथा सवारी साधनसहित तीन जनालाई नियन्त्रणमा लिएपछि सीमावर्ती क्षेत्रमा तस्करीको पुरानै प्रवृत्ति फेरि सतहमा आएको छ ।
सिम्रौनगढ नगरपालिका–१ वैरिया क्षेत्रमा नियमित चेकजाँचका क्रममा प्रहरीले भन्सार छली गरी नेपाल ल्याइएको आशंकामा ब्याट्री, इन्भर्टर, ई–रिक्सा र भारतीय नम्बरको मोटरसाइकलसहित तीन जनालाई पक्राउ गरेको हो ।
प्रहरीका अनुसार पक्राउ पर्नेमा भारतको बिहार राज्य मुजफ्फरपुर निवासी २२ वर्षीय अमन सिंह, बिहारको मोतिहारी जिल्ला बनकटवा प्रखण्ड बिजबनी निवासी २० वर्षीय अमर कुमार र बारा सिम्रौनगढ नगरपालिका–७ कबलपुर निवासी ४० वर्षीय खजान्ति साह रहेका छन् ।
प्रहरी चौकी श्रीनगर बैरियाबाट खटिएको टोलीले दक्षिणबाट उत्तरतर्फ आउँदै गरेको मधेश प्रदेश ०३–००१ ह ३२५८ नम्बरको ई–रिक्सा र भारतीय नम्बर BR06Z6215 को मोटरसाइकललाई शंकास्पद देखेपछि रोकी जाँच गरेको थियो ।
जाँचका क्रममा ई–रिक्साभित्र दुई थान Exide ब्याट्री, एक थान Eastman 105Ah ब्याट्री र एक थान Microtek इन्भर्टर फेला परेको प्रहरीले जनाएको छ । बरामद सामग्रीका सम्बन्धमा बिल, भन्सार तिरेको प्रमाण वा वैधानिक कागजात माग्दा सम्बन्धित व्यक्तिले कुनै प्रमाण पेश गर्न नसकेको प्रहरीको भनाइ छ ।
त्यसपछि प्रहरीले भन्सार छली गरी सामान नेपाल भित्र्याइएको आशंकामा उनीहरूलाई नियन्त्रणमा लिएको हो । बरामद सामग्री, ई–रिक्सा र मोटरसाइकलसहित कुल अनुमानित मूल्य करिब ४ लाख ७० हजार रुपैयाँ रहेको प्रहरीले जनाएको छ ।
पक्राउ परेका तीनै जना र बरामद सामानलाई आवश्यक अनुसन्धान तथा राजस्वसम्बन्धी कारबाहीका लागि वीरगञ्ज भन्सार कार्यालय, पर्सामा बुझाइएको छ ।
बारासहित पर्सा, रौतहट, सिरहा, सप्तरी र धनुषाजस्ता सीमावर्ती जिल्लामा भन्सार छलीका घटना पटक–पटक सार्वजनिक हुँदै आएका छन् । खुला सीमा, ग्रामीण नाका, स्थानीय आवतजावत र सीमित निगरानीको फाइदा उठाउँदै अवैध रूपमा सामान ओसारपसार गर्ने समूह सक्रिय रहने गरेको सुरक्षा स्रोतहरू बताउँछन् ।
पछिल्लो समय तस्करीमा ठूला गाडी मात्रै होइन, ई–रिक्सा, मोटरसाइकल, साइकललगायत साना सवारी साधन प्रयोग गर्ने प्रवृत्ति पनि बढेको देखिन्छ । एकैपटक ठूलो परिमाणमा सामान ल्याउँदा पक्राउ पर्ने जोखिम हुने भएकाले साना सवारीमार्फत पटक–पटक सामान ओसार्ने शैली अपनाइएको सुरक्षा निकायको बुझाइ छ ।
विशेषगरी ब्याट्री, इन्भर्टर, विद्युतीय सामग्री, लत्ताकपडा, किराना, औषधि तथा दैनिक उपभोग्य वस्तु भन्सार नतिरी नेपाल भित्र्याउने प्रयास हुँदै आएको छ । यस्ता गतिविधिले राज्यको राजस्वमा प्रत्यक्ष क्षति पुर्याउनुका साथै वैधानिक रूपमा कर तिरेर व्यवसाय सञ्चालन गर्ने व्यापारीहरूलाई समेत असर पार्ने गरेको छ ।
बाराको यो पछिल्लो घटनाले सीमावर्ती क्षेत्रमा राजस्व चुहावट नियन्त्रण अझै चुनौतीपूर्ण रहेको देखाएको छ । प्रहरीको नियमित गस्ती र चेकजाँचले केही घटना नियन्त्रणमा आए पनि भन्सार प्रशासन, सुरक्षा निकाय र स्थानीय समुदायबीच प्रभावकारी समन्वय नभएसम्म यस्ता गतिविधि पूर्ण रूपमा रोक्न कठिन देखिएको छ ।
2025-06-24-05-06-39.jpg)
