काठमाडौं । विदेशमा पसिना बगाएर जीवन बदल्ने सपना बोकेका पाँच नेपाली युवाको कथा अहिले एकाएक चर्चाको शिखरमा पुगेको छ। संयुक्त अरब इमिरेट्समा रोजगारी गर्दै आएका पाँच नेपाली युवाको टोलीले ३० मिलियन दिराम अर्थात् करिब रु. १ अर्ब २३ करोड बराबरको भाग्यशाली चिठ्ठा जितेपछि उनीहरू केवल चर्चामा मात्र आएका छैनन्, अब त्यो रकम वैधानिक रूपमा नेपाल भित्र्याएर लगानी गर्ने योजनासहित अघि बढेका छन्।
यूएईमा कार्यरत नेपाली युवाहरू गोर्खाका तैयव खान, पाल्पाका सन्दीप बि.क., नवलपुरका दिलीपराज गैरे, कास्कीका शिशिर पौडेल र रुपन्देहीका सुदिप न्यौपानेले The UAE Lottery मार्फत यो ठूलो पुरस्कार हात पारेका हुन्। खाडीमा श्रम गरेर भविष्य बनाउने सपना देखेका यी पाँच युवाको जीवनमा भाग्यले यस्तो मोड लियो कि सामान्य कामदारको जीवनबाट उनीहरू एकैपटक करोडौंको मालिक बन्न पुगे।
२०२६ जुलाई २ अर्थात् २०८३ असार १८ गते उनीहरूले अबुधाबीस्थित नेपाली राजदूतावास पुगेर यूएईका लागि नेपाली राजदूत तेजबहादुर क्षेत्रीसँग सामूहिक भेट गरेका थिए। भेटमा उनीहरूले आफूहरूले जितेको रकमलाई वैधानिक बाटोबाट नेपाल पठाउन चाहेको र उक्त रकम नेपालमै लगानी गर्न इच्छुक रहेको बताएका छन्।
यो केवल चिठ्ठा जितेको खुसीको भेटघाट मात्र थिएन। विदेशमा कमाएको वा जितेको ठूलो रकम कसरी कानुनी बाटोबाट नेपाल भित्र्याउने, कसरी सुरक्षित लगानी गर्ने र कसरी त्यो रकम देशको उत्पादनशील क्षेत्रमा उपयोग गर्ने भन्ने विषयमा दूतावाससँग उनीहरूले सहयोग मागेका छन्।
भेटका क्रममा विजेता युवाहरूले दूतावासमार्फत आवश्यक सहजीकरणका लागि आग्रह गर्दै नेपाल सरकारले पनि यस्तो रकम वैधानिक रूपमा भित्र्याउने प्रक्रियामा सहयोग गरिदिनुपर्ने धारणा राखेका थिए। उनीहरूको चाहना स्पष्ट देखिन्छ-भाग्यले दिएको धनलाई केवल व्यक्तिगत विलासितामा होइन, नेपालमा लगानी गरेर भविष्य निर्माणमा प्रयोग गर्ने।
राजदूत तेजबहादुर क्षेत्रीले उनीहरूलाई बधाई दिँदै नेपालमा लगानीका सम्भावित क्षेत्रहरूको गहिरो अध्ययन गर्न सुझाव दिएका छन्। उनले नेपालको विकास, रोजगारी सिर्जना र समृद्धिसँग जोडिने क्षेत्रमा लगानी गर्न प्रेरित गर्दै पुरस्कारबाट प्राप्त रकम वैधानिक रूपमा नेपाल पठाउने प्रक्रियामा नेपाली राजदूतावासको पूर्ण सहयोग रहने बताएका छन्।
विदेशमा श्रम गर्ने नेपालीका लागि यो घटना उत्साहजनक मात्र होइन, प्रेरणादायी पनि छ। हजारौं नेपाली खाडी मुलुकमा पसिना बगाइरहेका बेला पाँच युवाले पाएको यो भाग्यशाली अवसरले एउटा नयाँ प्रश्न पनि उठाएको छ-यदि यत्रो रकम वैधानिक रूपमा नेपाल भित्रिएर उत्पादनशील क्षेत्रमा लगानी भयो भने त्यसले कति रोजगारी सिर्जना गर्न सक्छ ?
भेटघाटमा प्रभु बैंकका यूएई प्रतिनिधि प्रकाश पौडेल, पत्रकार उमाकान्त पाण्डे र उद्योग वाणिज्य महासंघका सचिव केदारनाथ अधिकारीसमेत सहभागी थिए। यसले विजेताहरूको योजना केवल औपचारिक भेटघाटमा सीमित नभई बैंकिङ, मिडिया र निजी क्षेत्रसँग जोडिएको गम्भीर पहलका रूपमा अघि बढ्न सक्ने संकेत गरेको छ।
खाडीमा श्रम गर्ने नेपाली युवाहरूका लागि यो कथा सपनाजस्तो लाग्न सक्छ। तर यो सपनाको अर्को पाटो अझ महत्वपूर्ण छ-धन जित्नु ठूलो कुरा हो, तर त्यसलाई वैधानिक रूपमा नेपाल भित्र्याएर सही ठाउँमा लगानी गर्नु अझ ठूलो जिम्मेवारी हो।
अब सबैको चासो एउटै छ-रु. १ अर्ब २३ करोडको यो भाग्यशाली रकम नेपाल कसरी भित्रिन्छ, कहाँ लगानी हुन्छ, र पाँच नेपाली युवाको यो सफलता कथा व्यक्तिगत भाग्यमा सीमित रहन्छ कि राष्ट्रिय लगानीको उदाहरण बन्छ ?
