एआईजी सरुवा : काठमाडौं उपत्यका, अपराध अनुसन्धानदेखि सीआईबीसम्म नेतृत्व फेरियो

काठमाडौं । सरकारले नेपाल प्रहरीका आठ जना प्रहरी अतिरिक्त महानिरीक्षक (एआईजी) को सरुवा गरेको छ । २०८३ असार १८ गते बसेको मन्त्रिपरिषद् बैठकले एक वर्षे कार्यकाल पूरा गरेका एआईजीहरूको जिम्मेवारी हेरफेर गरेको स्रोतले बताएको छ ।

प्रहरी संगठनभित्र महत्वपूर्ण मानिने अपराध अनुसन्धान विभाग, केन्द्रीय अनुसन्धान ब्युरो (सीआईबी), काठमाडौं उपत्यका प्रहरी कार्यालय, प्रशासन विभाग, मानवस्रोत विभाग, कार्य विभाग, प्रदेश समन्वय विभाग र प्रहरी एकेडेमीमा नेतृत्व परिवर्तन भएको हो ।

स्रोतका अनुसार प्रहरी एकेडेमीमा राजन अधिकारी, अपराध अनुसन्धान विभागमा डा. मनोज केसी, कार्य विभागमा सिद्धि विक्रम शाह र काठमाडौं उपत्यका प्रहरी कार्यालयमा सुशील सिंह राठौरको सरुवा भएको छ ।

त्यसैगरी, प्रहरी संगठनकै संवेदनशील मानिने केन्द्रीय अनुसन्धान ब्युरो (सीआईबी)मा उमा चतुर्वेदीलाई पठाइएको छ । प्रशासन विभागमा डम्बर बिक, प्रदेश समन्वय विभागमा हिमालय श्रेष्ठ र मानवस्रोत विभागमा ईश्वर कार्कीको सरुवा भएको स्रोतले जानकारी दिएको छ ।

नेपाल प्रहरीभित्र एआईजीको सरुवा केवल नियमित प्रशासनिक प्रक्रिया मात्र मानिँदैन । अपराध अनुसन्धानको दिशा, प्रदेश समन्वय, संगठनभित्रको जनशक्ति व्यवस्थापन, सरुवा–बढुवा प्रणाली, प्रहरी तालिम तथा राजधानीको सुरक्षा व्यवस्थासँग प्रत्यक्ष जोडिने भएकाले यो निर्णयलाई प्रहरी वृत्तमा अर्थपूर्ण रूपमा हेरिएको छ ।

विशेषगरी सीआईबी, अपराध अनुसन्धान विभाग र काठमाडौं उपत्यका प्रहरी कार्यालयमा हुने नेतृत्व परिवर्तनले आगामी दिनमा ठूला अनुसन्धान, आर्थिक अपराध, संगठित अपराध, साइबर तथा बैंकिङ कसुर, ठगी, फरार अभियुक्त पक्राउ र राजधानीको शान्ति सुरक्षामा कस्तो प्रभाव पार्छ भन्ने विषयमा प्रहरीभित्र चासो बढेको छ ।

सरकारले यस सरुवालाई नियमित प्रक्रिया भने पनि प्रहरी संगठनभित्र भने यसलाई भावी नेतृत्व समीकरण, जिम्मेवारी सन्तुलन र संवेदनशील निकायमा विश्वासपात्र अधिकृत परिचालनको संकेतका रूपमा समेत व्याख्या गर्न थालिएको छ ।

मन्त्रिपरिषद् निर्णयको औपचारिक सूची सार्वजनिक भएपछि सरुवा कार्यान्वयनको प्रक्रिया अघि बढ्ने बताइएको छ ।

सरुवा भएका एआईजी र जिम्मेवारी