प्रहरी प्रधान कार्यालय नक्सालस्थित कर्मचारी प्रशासन शाखाले सार्वजनिक गरेको पत्रअनुसार विभिन्न प्रदेश कार्यालय, अनुसन्धान ब्युरो, तालिम केन्द्र तथा जिल्ला प्रहरी परिसरहरूमा कार्यरत एसएसपीहरूको जिम्मेवारी हेरफेर गरिएको हो।
सरुवासँगै अपराध अनुसन्धान, मानव बेचबिखन, लागूऔषध नियन्त्रण, तालिम व्यवस्थापन र प्रदेश समन्वयजस्ता संवेदनशील जिम्मेवारीमा नयाँ नेतृत्व पुगेको छ।
अनुसन्धान र प्रदेश समन्वयमा व्यापक फेरबदल
निर्णयअनुसार लुम्बिनी प्रदेश प्रहरी कार्यालय, शान्ति सुरक्षा महाशाखा तुल्सीपुर दाङमा कार्यरत एसएसपी अजय केसीलाई नेपाल प्रहरी युक्ति तालिम महाविद्यालय जर्गाह, पश्चिम नवलपरासीमा सरुवा गरिएको छ भने पश्चिम नवलपरासीमा रहेका एसएसपी अनुपम शमशेर जबरालाई केन्द्रीय अनुसन्धान ब्युरो (सीआईबी) विशेष अपराध अनुसन्धान महाशाखा लाजिम्पाट, काठमाडौंमा ल्याइएको छ।
त्यस्तै, मधेश प्रदेश प्रहरी कार्यालय जनकपुरको अपराध नियन्त्रण तथा अनुसन्धान महाशाखामा रहेका एसएसपी कमल थापालाई नेपाल प्रहरी प्रदेश कार्यालय बनेपा, काभ्रेपलाञ्चोक पठाइएको छ। लागूऔषध नियन्त्रण ब्युरो काठमाडौंमा कार्यरत एसएसपी कृष्णप्रसाद कोइरालालाई गण्डकी प्रदेश प्रहरी कार्यालय पोखराको अपराध अनुसन्धान महाशाखामा सरुवा गरिएको छ।
मानव बेचबिखन अनुसन्धान ब्युरो काठमाडौंका एसएसपी कृष्णप्रसाद पनेरुलाई नेपाल प्रहरी प्रधान कार्यालयको अन्तर्राष्ट्रिय प्रहरी समन्वय महाशाखा नक्सालमा जिम्मेवारी दिइएको छ।
प्रदेश कार्यालय र जिल्ला परिसरमा नयाँ जिम्मेवारी
नेपाल प्रहरी प्रदेश समन्वय विभाग नक्सालमा रहेका एसएसपी कृष्णबहादुर पल्ली मगरलाई नेपाल प्रहरी प्रदेश कार्यालय वीरगञ्ज पठाइएको छ। कोशी प्रदेश प्रहरी तालिम केन्द्र विराटनगर मोरङका एसएसपी गोविन्द अधिकारीलाई प्रहरी प्रधान कार्यालय प्रदेश समन्वय विभाग नक्सालमा ल्याइएको छ।
गण्डकी प्रदेश प्रहरी तालिम केन्द्र पोखराका एसएसपी जनार्दन जी.सी. लाई प्रहरी प्रधान कार्यालय प्रशासन विभाग कल्याण महाशाखामा काज सरुवा गरिएको छ।
त्यस्तै, गण्डकी प्रदेश प्रहरी कार्यालय पोखराको अपराध अनुसन्धान महाशाखामा रहेका एसएसपी तुलबहादुर कार्कीलाई जिल्ला प्रहरी परिसर ललितपुरको जिम्मेवारी दिइएको छ। मधेश प्रदेश प्रहरी कार्यालय जनकपुरका एसएसपी दयानिधि ज्ञवालीलाई लुम्बिनी प्रदेश प्रहरी तालिम केन्द्र बुटवल पठाइएको छ।
नेपाल प्रहरी प्रधान कार्यालय मानवस्रोत विकास विभागअन्तर्गत वृत्ति विकास महाशाखामा कार्यरत एसएसपी दिलीप घिमिरेलाई जिल्ला प्रहरी परिसर काठमाडौंमा सरुवा गरिएको छ।
संगठनभित्र शक्ति सन्तुलनको संकेत ?
नेपाल प्रहरीमा एसएसपी तहको सरुवालाई सामान्य प्रशासनिक प्रक्रिया मात्र नभई संगठनभित्रको शक्ति सन्तुलन, भावी बढुवा तयारी र संवेदनशील अनुसन्धान इकाइमा प्रभाव विस्तारसँग पनि जोडेर हेरिने गरिन्छ।
विशेषगरी सीआईबी, मानव बेचबिखन अनुसन्धान ब्युरो, लागूऔषध नियन्त्रण ब्युरो, जिल्ला प्रहरी परिसर काठमाडौं–ललितपुर तथा प्रदेश कार्यालयहरूलाई आगामी दिनमा सुरक्षा चुनौती, राजनीतिक गतिविधि र आर्थिक अपराध अनुसन्धानका दृष्टिले महत्वपूर्ण मानिन्छ।
स्रोतका अनुसार आगामी एआईजी र डीआईजी तहको सम्भावित बढुवा तथा संगठन पुनर्संरचनालाई ध्यानमा राख्दै प्रहरी नेतृत्वले रणनीतिक रूपमा यो सरुवा गरेको बुझिएको छ।
नेपाल प्रहरीमा पछिल्लो समय अनुसन्धान क्षमताभन्दा ‘पावर सेन्टर’ नजिकको पहुँचलाई प्राथमिकता दिने प्रवृत्तिबारे पनि भित्रभित्रै चर्चा हुने गरेको छ। त्यसैले यसपटकको सरुवालाई केवल प्रशासनिक हेरफेर नभई संगठनभित्रको शक्ति समीकरणको संकेतका रूपमा समेत विश्लेषण गर्न थालिएको छ।
