दोहा, कतार । कतारमा कार्यरत नेपाली श्रमिकहरूलाई लक्षित गर्दै नेपाली राजदूतावास, दोहाले श्रमिक सचेतना कार्यक्रम २०८३ जेठ १ गते सम्पन्न गरेको छ । Building and Wood Workers’ International (BWI) को सहयोग तथा समन्वयमा राजदूतावासको सभाहलमा आयोजित कार्यक्रममा एक सयभन्दा बढी नेपाली श्रमिकहरूको सहभागिता रहेको थियो ।
नेपालको राष्ट्रिय गानबाट सुरु भएको कार्यक्रममा श्रमिकहरूको स्वास्थ्य, कार्यस्थल सुरक्षा, श्रम स्वीकृति, सामाजिक सुरक्षा, वित्तीय साक्षरता र मानसिक स्वास्थ्यका विषयमा विज्ञहरूले जानकारीमूलक प्रस्तुति दिएका थिए । सहभागी श्रमिकहरूले पनि आफ्ना जिज्ञासा राख्दै सक्रिय सहभागिता जनाएका थिए ।
कार्यक्रममा निशा पराजुलीले “Heat Stress Management” विषयमा प्रस्तुति दिँदै कतारको अत्यधिक गर्मीमा काम गर्दा हुनसक्ने स्वास्थ्य समस्या र त्यसबाट जोगिने उपायबारे जानकारी गराउनुभयो । उहाँले पर्याप्त पानी पिउने, विश्राम लिने, शरीरमा देखिने असामान्य लक्षणलाई बेवास्ता नगर्ने र समयमै स्वास्थ्य सतर्कता अपनाउनुपर्नेमा जोड दिनुभयो ।
नेपाली राजदूतावास, दोहाका श्रम सहचारी प्रेम प्रसाद पोखरेलले श्रम स्वीकृति, श्रम कानून, सामाजिक सुरक्षा तथा वैदेशिक रोजगारीमा रहेका नेपाली श्रमिकहरूले ध्यान दिनुपर्ने कानुनी र व्यवहारिक पक्षबारे जानकारी गराउनुभयो ।
त्यसैगरी बिमल सुवेदीले “Occupational Health and Safety” विषयमा प्रस्तुति दिँदै कार्यस्थलमा सुरक्षा उपकरणको प्रयोग, सावधानी र दुर्घटनाबाट बच्ने उपायबारे प्रकाश पार्नुभयो । उहाँले ‘आफ्नो सुरक्षा आफैँ’ भन्ने सन्देशलाई व्यवहारमा उतार्न श्रमिकहरूलाई आग्रह गर्नुभयो ।
बैंकिङ साक्षरतासम्बन्धी सत्रमा मनोज भण्डारीले कमाइको सही व्यवस्थापन, बचत, सुरक्षित बैंकिङ अभ्यास र औपचारिक माध्यमबाट रेमिट्यान्स पठाउनुपर्ने विषयमा जोड दिनुभयो । योग साधिका श्रद्धा कटुवालले मानसिक स्वास्थ्यका लागि योग र ध्यानको महत्वबारे चर्चा गर्दै सहभागीहरूलाई योग अभ्याससमेत गराउनुभएको थियो ।
कार्यक्रमको समापन गर्दै कार्यवाहक राजदूत कुमार राईले वैदेशिक रोजगारीमा रहेका नेपाली नागरिकका लागि स्वास्थ्य, सुरक्षा र सचेतना अत्यन्त महत्वपूर्ण विषय भएको बताउनुभयो । यस्ता कार्यक्रमले श्रमिकहरूमा व्यवहारिक ज्ञान, आत्मविश्वास र सचेतना अभिवृद्धि गर्ने उहाँको भनाइ थियो ।
कार्यक्रम नेपाली राजदूतावास, दोहाकी द्वितीय सचिव स्मारिका सुवेदीले सञ्चालन गर्नुभएको थियो ।
