मुस्ताङ । मुस्ताङको वारागुङ मुक्तिक्षेत्र गाउँपालिका–१ अन्तर्गत पर्ने थोराङ्ला पास र मुक्तिनाथ क्षेत्रमा भारी हिमपातमा फसेका दुई जना पर्यटकलाई नेपाली सेनाले सकुशल उद्धार गरेको छ ।
नेपाली सेनाका अनुसार २०८३ वैशाख २३ गते राति हिमपातका कारण अलपत्र परेका पर्यटकहरूको उद्धार नेपाली सेना इन्द्रबक्स गणको टोलीले गरेको हो । प्रतिकूल मौसम र अत्यधिक चिसोका बीच सेनाको टोली तत्काल उद्धार कार्यमा खटिएको थियो ।
सेनाले दिएको जानकारी अनुसार पर्यटकहरू हिमपातका कारण बाटो अवरुद्ध भएपछि जोखिमपूर्ण अवस्थामा फसेका थिए । घटनाबारे सूचना प्राप्त हुनासाथ सेनाको टोली परिचालन गरिएको र खोज तथा उद्धार अभियान सञ्चालन गरी उनीहरूलाई सुरक्षित स्थानमा ल्याइएको जनाएको छ ।
उच्च हिमाली क्षेत्रमा पछिल्ला दिनहरूमा मौसम प्रतिकूल बन्दै गएको तथा हिमपात बढेकाले यात्रा गर्दा विशेष सावधानी अपनाउन पनि सेनाले आग्रह गरेको छ ।
थोराङ्ला पास क्षेत्र विश्वप्रसिद्ध पदमार्गमध्ये एक मानिन्छ । समुद्री सतहबाट अत्यधिक उचाइमा पर्ने यस क्षेत्रमा मौसम अचानक परिवर्तन हुने भएकाले पर्यटकहरू बेला–बेलामा जोखिममा पर्ने गरेका छन् ।
