सिन्धुली, २२ वैशाख । अविरल वर्षा र मौसमको प्रतिकूल अवस्थाका कारण बीपी राजमार्ग सिन्धुलीमा सवारी साधन सञ्चालन पूर्ण रूपमा बन्द गरिएको छ। जिल्ला प्रशासन कार्यालय सिन्धुलीद्वारा जारी सूचनाअनुसार जिल्लाका विभिन्न स्थानमा आएको बाढी, पहिरो तथा सडक अवरुद्ध हुने जोखिम बढेपछि तत्कालका लागि सवारी आवागमन रोक लगाइएको हो।
सूचनामा उल्लेख भएअनुसार देशभर मनसुन सक्रिय भएसँगै सिन्धुली जिल्लाका विभिन्न क्षेत्रमा भारी वर्षा भइरहेको छ। वर्षासँगै नदी-नालामा पानीको बहाव बढ्नुका साथै पहिरो खस्ने जोखिम उच्च भएकाले यात्रु तथा सवारी साधनको सुरक्षालाई ध्यानमा राख्दै यस्तो निर्णय गरिएको जनाइएको छ।
विशेषगरी वी.पी. राजमार्गअन्तर्गत सिन्धुली-काभ्रे खण्डका विभिन्न स्थानमा सडक अवरुद्ध हुने, खोलानाला बढ्ने तथा आकस्मिक दुर्घटना हुनसक्ने अवस्थालाई मध्यनजर गर्दै जिल्ला सुरक्षा समितिको बैठकले सवारी सञ्चालन रोक्ने निर्णय गरेको हो।
जिल्ला प्रशासनले आज वैशाख २२ गतेदेखि अर्को सूचना जारी नभएसम्मका लागि उक्त क्षेत्रमा सवारी साधन पूर्ण रूपमा सञ्चालन नगर्न निर्देशन दिएको छ। अत्यावश्यक अवस्थामा बाहेक यात्रा नगर्न र यात्रा गर्नै परे सम्बन्धित निकायसँग सम्पर्क गरी सडकको अवस्था बुझेर मात्र यात्रा गर्न सर्वसाधारणलाई अनुरोध गरिएको छ।
प्रशासनले मौसम सामान्य नहुँदासम्म जोखिम कायमै रहने भन्दै नागरिकलाई सतर्क रहन आग्रह गरेको छ। साथै, फिर्ता हुने अवस्थामा पुनः सवारी सञ्चालनबारे जानकारी गराइने जनाएको छ।
