काठमाडौं । नेपाल एष्ट्रोनोमिकल सोसाइटी (नासो) ले राष्ट्रिय विज्ञान दिवस, विश्व अन्तरिक्ष सप्ताह र विश्व विज्ञान दिवस संदर्भ पारेर अन्तरिक्ष र दीगोपना विषयमा चित्रकला तथा वक्तृत्वला प्रतियोगिता गर्ने भएको छ ।
प्रतियोगिताको लागि विद्यालयतहको कक्षा ६ देखि १२ सम्म अध्ययनरत ईच्छुक विद्यार्थीहरुले असोज १४ गतेसम्म नासोका वेइभसाइट मार्फत आवेदन दर्ता गर्न सक्नेछन् ।
‘दुवै प्रतियोगिताका लागि यो वर्षको शिर्षक ‘अन्तरीक्ष र दीगोपना’ तय गरिएको छ,’ नासोद्वारा जारी विज्ञप्तिमा भनिएको छ ।
वक्तृत्वकलामा विद्यार्थीहरूको रचनात्मक प्रस्तुतिलाई स्थान दिन भिडियो संपादन गर्न छुट दिइएको छ । त्यस्तै चित्रकलाका सम्बन्धमा पनि विद्यार्थीहरुले आफ्नो रचनालाई बढीमा एक मिनटमा व्याख्या गरेको भिडियो बनाएर पठाउनुपर्नेछ ।
‘यसरी प्राप्त रचनाहरूमध्ये उत्कृष्ट रचनाहरू नेपाल एष्ट्रोनोमिकल सोसाईटीको आधिकारिक युट्युब च्यानलमा जनमतको लागि राखिनेछ । पुरस्कार संबन्धि निर्णय गर्दा ५० प्रतिशत जनमत तथा ५० प्रतिशत निर्णायक मण्डलको मूल्याङ्कनलाई आधार बनाइनेछ,’ नासोले भनेको छ ।
प्रतियोगितामा आवेदन गरिएका रचना प्रतियोगिता अवधिभर अन्य कुनै स्थानमा सार्वजनिक गर्न नपाइने नासोले जनाएको छ ।
छैठौं राष्ट्रिय अन्तरिक्ष चित्रकला प्रतियोगिताको लागि कक्षा ६ देखि ८ सम्म अध्ययनरत विद्यार्थी भाईबहिनीहरुले आवेदन दिन सक्नेछन् । प्रतियोगितामा प्रथम हुनेले टेलिस्कोप, पदक तथा प्रमाणपत्र प्राप्त गर्नेछन भने दोस्रो र तेश्रो हुनेले क्रमशः गिफ्ट ह्याम्पर, पदक तथा प्रमाणपत्र प्राप्त गर्नेछन् ।
त्यस्तै चौथो राष्ट्रिय अनलाइन अन्तरिक्ष वक्तृत्वकला प्रतियोगितामा कक्षा ९ देखि १२ सम्म अध्ययनरत विद्यार्थी भाईबहिनीहरुले आवेदन दिन सक्नेछन् । प्रतियोगितामा प्रथम, दोश्रो तथा तेस्रो हुने विद्यार्थी भाईबहिनीहरुलाई पुरस्कार स्वरुप क्रमशः नगद १० हजार रुपैयाँ, पाँच हजार रुपैयाँ र ३ हजार रुपैयाँ पदक र प्रमाणपत्र प्रदान गरिनेछ ।
