सुनसरी । नेपालका सीमा नाकाहरूबाट विभिन्न बस्तुहरूकाे तस्करी बढ्दै गएकाे छ । नेपाल प्रहरी र सशस्त्र प्रहरीले आक्कलझुक्कल पक्राउ पनि गर्ने गरेकाे छ । तस्करी कै सामान पक्राउ गर्ने क्रममा सुनसरी जिल्लाको कोशी गाउँपालिका ८ स्थित पुर्व–पश्चिम लोकमार्गबाट २०७८ चैत ९ गते सशस्त्र प्रहरीले करिब ९ लाख रुपैयाँ बराबरको कपालसहित ३ जनालाई पक्राउ गरेको छ ।
पक्राउ पर्नेहरुमा गाडी चालक झापा जिल्लाको बिर्तामोड नगरपालिका ८ बस्ने ३४ वर्षीय नविन खड्का, सह चालक झापा जिल्लाकै भद्रपुर नगरपालिका ४ बस्ने ३४ वर्षीय सुरेन्द्र निरौला र उक्त कपाल ल्याउँने ब्यक्ति भारतमा घर बताउने ३४ वर्षीय ताजमोल शेख रहेकाे सशस्त्र प्रहरीले जानकारी दिएकाे छ ।
सशस्त्र प्रहरी बल नेपाल बिओपी हरीपुरबाट खटिएको सशस्त्र प्रहरीले मे १ ख २६१२ नम्बरको ट्रकमा जाँच गर्दा १ हजार ५० के.जी. कपालको बिल बिजक नभएको पाईएपछि बरामद गरिएको हो । सशस्त्र प्रहरीबाट सामान बाेक्ने ट्रकसमेत बरामद गरिएको छ ।
पक्राउ परेकाहरुलाई बरामद कपाल तथा ट्रकसहित आवश्यक कारवाहीको लागि राजश्व अनुसन्धान कार्यालय ईटहरीमा बुझाईएको छ ।
