काठमाडौं । गण्डकीको मुख्यमन्त्रीमा नेपाली कांग्रेसका कृष्णचन्द्र नेपाली पोखरेल नियुक्त भएका छन् ।
गण्डकी प्रदेशसभाकी प्रमुख सीता पौडेलले ०७८ जेठ २९ गते शनिबार पोखरेललाई मुख्यमन्त्रीमा नियुक्त गरेकी हुन् ।
निवर्तमान मुख्यमन्त्री पृथ्वी सुब्बा गुरुङले शुक्रबार विश्वासको मत पाउन नसकेपछि प्रदेश प्रमुख पौडेलले सरकार गठनका लागि संविधानको धारा १६८(५) अनुसार २४ घण्टाको समय दिएर सरकार गठनका लागि आह्वान गरेकी थिइन् । जसमा पोखरेलले प्रदेशसभाका ३१ सांसदको हस्ताक्षरसहित दाबी पेस गरेका थिए । निवर्तमान मुख्यमन्त्री गुरुङले पनि दाबी गरेका थिए । केन्द्रकै जस्तो गरी प्रदेशसभालाई पनि विघटन गराउने ध्येयले गुरुङले त्यसो गरेको आरोप लागेको छ । तर पौडेलले पोखरेललाई मुख्यमन्त्रीमा नियुक्त गरेको गण्डकी प्रदेश प्रमुखको कार्यालयले जनाएको छ ।
योसँगै पोखरेल कांग्रेसको तर्फबाट मुख्यमन्त्री हुने पहिलो व्यक्ति बनेका छन् ।
संविधानतः अब पोखरेलले ३० दिनभित्र प्रदेशसभाबाट विश्वासको मत लिनुपर्नेछ ।
