काठमाडौं । बागमती प्रदेशसभाको बैठक पुनः स्थगित भएको । प्रदेशसभाको आजका लागि तय गरिएको बैठक सूचना टाँस गरेर स्थगित गरिएको हो ।
बुधबार दिउँसो २ बजेका लागि बोलाइएको बैठकमा मुख्यमन्त्री डोरमणि पौडेलविरूद्ध गत माघ ९ मा टेबुल भएको अविश्वासको प्रस्तावमाथि छलफल थाल्ने कार्यसूची थियो । तर विशेष कारण देखाउँदै बैठक स्थगित गरिएको छ ।
प्रदेशसभाका सचिव कृष्णहरि खड्काले एक विज्ञप्ति जारी गर्दै अनिश्चितकालका लागि बैठक स्थगित भएको जनाएका छन् ।
बागमती प्रदेशसभामा मुख्यमन्त्रीविरुद्ध अविश्वासको प्रस्ताव पेस भएपछि पटक पटक स्थगित गरिएको छ । यसअघि गत माघ १९ गते बैठक डाकिएकोमा स्थगित गरिएको थियो ।
पटक पटक प्रदेशसभाको बैठक स्थगित गरेपछि मुख्यमन्त्रीविरुद्धको अविश्वास प्रस्तावको छलफल पछाडि धकेलिएको छ । अविश्वास प्रस्ताव दर्ता गराएका प्रचण्ड–माधव नेपाल समूहले सभामुखको कार्यशैलीप्रति असन्तोष जनाएका छन् ।
