काठमाडौं । लामो दूरीका सार्वजनिक सवारी र हवाई उडानमा भदौ १५ सम्म रोक लगाउने निर्णय सरकारले गरेको छ ।
सोमबार बसेको मन्त्रिपरिषद् बैठकले लामो दूरीका सार्वजनिक सवारी र हवाई उडानबारे गरेको निर्णय परिमार्जन गरेको हो । यसअघि भदौ १ गतेबाट लामो दूरीका सार्वजनिक सवारी र हवाई उडान सञ्चालनमा ल्याउने निर्णय सरकारले गरेको थियो ।
कोरोना भाइरसको जोखिम बढेपछि यसअघि गरिएको निर्णयमा परिमार्जन गरिएको सरकारका एक मन्त्रीले जानकारी दिए ।
गत चैत ११ बाट लगाइएको लकडाउनपछि लामो दूरीका सवारी साधन र हवाई उडान रोकिएका थिए । संक्रमण बढ्दै गएपछि यसको सञ्चालनमा थप अन्योलता उत्पन्न भएको छ ।
त्यस्तै, सीमा नाका र काठमाडौं प्रवेश गर्ने नाकामा थप कडाइ गर्ने निर्णय पनि मन्त्रिपरिषद् बैठकले गरेको छ ।



