काठमाडौं । नेपाल एशोसिएशन अफ टुर एण्ड ट्राभल एजेन्ट्स (नाट्टा)को २०७६ माघ ३ मा हुने निर्वाचनमा तीन समूहले उम्मेदवारी दिएका छन् । संघको ५३ औं साधारण सभाबाट हुने केन्द्रीय कार्यसमितिको निर्वाचनमा अध्यक्षको लागि नेकपा निकट भीमप्रसाद पन्तको समूह चुनावी मैदानमा बलियो गरी खडा भएको छ । कांग्रेस निकट मिहिका राज्यलक्ष्मी शाह धाख्वा र अच्युत गुरागाईंको छुट्टाछुट्टै प्यानल बनेको छ । कांग्रेस निकट दुई समूह भएका कारण पनि पन्त समूहलाई थप सहज भएको छ ।
२०७६ पुस २४ सम्म उम्मेदवारी फिर्ता नलिएपछि अब तीनै समूह चुनावी मैदानमा भिड्ने निश्चित भएको छ । नेकपा निकट व्यावसायीबीचकै मनोमालिन्यका कारण विगतमा टानको चुनाव हार्न पुगेपछि त्यसबाट शिक्षा लिई अहिले पन्त समूहलाई एकमना एकताका साथ चुनावमा उतारेको छ । तर, कांग्रेसका भने शाह र गुरागाई २ प्यानल मैदानमा देखिएका छन् ।
पन्तको प्यानलबाट वरिष्ठ उपाध्यक्षमा विनय बस्नेत, उपाध्यक्षमा वरुण मेहता, महासचिवमा सुधिरकुमार उपाध्याय पौडेल, सचिवमा जिस्वान तुलाधर श्रेष्ठ र कोषाध्यक्षमा हरिभक्त श्रेष्ठले उम्मेदवारी दिएका छन् ।
सदस्यहरुमा पन्त समूहबाट सुवर्ण श्रेष्ठ, हरिकुमार श्रेष्ठ, बिष्णु कार्की, लक्ष्मी कार्की अधिकारी, डेन्डी शेर्पा, लक्ष्मी कार्की अधिकारी, चुडाबहादुर जिम्बा, गीता ढकाल रेजु र रामशोभित नायकले उम्मेदवारी दिएका छन् ।
त्यस्तै शाहको प्यानलबाट वरिष्ठ उपाध्यक्षमा नारायण प्रसाद गुरुङ, उपाध्यक्षमा रमेश थापा, महासचिवमा कमला गुरुङ, सचिवमा अमृत कुमार ढकाल र कोषाध्यक्षमा देवकी गुरुङ रहेका छन् ।
अच्युत गुरागाईको प्यानलबाट भने वरिष्ठ उपाध्यक्षमा हेमराज बास्तोला, उपाध्यक्षमा यज्ञमूर्ति आचार्य, महासचिवमा राकेश धमला, सचिवमा गोविन्द दाहाल र कोषध्यक्षमा कुमार थपलियाले उम्मेदवारी दर्ता गराएका छन् ।
