• सोमबार-भदौ-९-२०७६

सहमति भए नेतृत्वको दाबी गर्दिन : वरिष्ठ नेता पौडेल


चितवन, २० असार (रासस) : नेपाली काङ्ग्रेसका वरिष्ठ नेता रामचन्द्र पौडेलले पार्टीलाई एकजुट बनाउन सक्ने नेतृत्व खोज्नुपर्ने बताएका छन् । नेपाल प्रेस युनियन चितवनले यहाँ असार २० गते  आयोजना गरेको पत्रकार सम्मेलनमा  पौडेलले त्यस्तो सहमति भएमा आफूले नेतृत्वको दाबी नगर्ने बताएका छन्।

 
    पार्टीभित्र सुधार र परिवर्तन आवश्यक रहेको बताउँदै  पौडेलले समयमा नै महाधिवेशन गर्नु पर्नेमा जोड दिए  ।

 

पौडेलले भने “म नहुँदा पनि एकता हुन सक्छ । जसमा एकता हुन्छ छलफलबाट त्यसैलाई नेतृत्व दिनुपर्छ ।” पार्टीमा सुधार र परिवर्तनको आवश्यकता रहेको भन्दै पौडेलले त्यसका पक्षधरसँग छलफल भइरहेको जानकारी दिए  । 

 

    पार्टीले प्रतिपक्षको सशक्त भूमिका निर्वाह गर्नुपर्ने भन्दै  पौडेलले यस विषयमा पार्टीभित्र छलफल भइरहेको बताए  । काङ्ग्रेसलाई बलियो बनाउन तलैबाट सङ्गठन मजबुत बनाएर लैजानुपर्ने पौडेलको भनाइ थियो । 

 

    सरकारप्रति आक्रोश पोख्दै पौडेलले अहिलेको नेतृत्वको जनताले विकल्प खोजेको बताए  । उनले भने, “त्यो विकल्प कम्युनिष्टबाट हुन सक्दैन अब काङ्ग्रेस तयार हुनुपर्छ ।” जनताको अगाडि भरोसाका रुपमा काङ्ग्रेसलाई अगाडि बढाउनुपर्ने भन्दै पौडेलले गणितले केही पनि गर्दैन भने  । पौडेलले भने, “नेपाली काङ्ग्रेसको जनाधार र भूमिका महत्वपूर्ण भएकाले अङ्क गणितले असर पार्दैन ।”

 

    सरकारले आफ्ना पक्षधरलाई मात्र पक्षपोषण गरेर विपक्षीलाई बेवास्था गरेको आरोप लगाए  । 
 

प्रतिकृया दिनुहोस