दमौली, १७ चैत : श्रीमतीलाई कुटपिट गरी हत्या गरेको अभियोगमा प्रहरीले आज यहाँ एक जनालाई पक्राउ गरेको छ । प्रहरीले ३५ वर्षीया फूलमाया नेपालीलाई कुटपिट गरी हत्या गरेको अभियोगमा तनहुँको शुक्लागण्डकी नगरपालिका–७ म्याराथन धारापानीका ४० वर्षीय श्रीराम श्रेष्ठलाई पक्राउ गरेको हो ।
श्रीरामले शुक्रबार मादक पदार्थ सेवन गरी फूलमायालाई कुटपिट गरी हत्या गरेको प्रहरी नायब उपरीक्षक श्यामु अर्यालले जानकारी दिए । उनले श्रीमतीको शवलाई घरदेखि करीब २० मिटर टाढा बारीमा फालेका थिए । हत्या अभियोगमा पक्राउ परेका श्रीरामलाई तनहुँ जिल्ला अदालतबाट म्याद थप गर्ने तयारी भइरहेको छ ।
ढिस्कोले पुरिँदा घाइते
माटोको ढिस्कोले पुरिएर तनहुँको देवघाट गाउँपालिका–५ मा आज दुई जना घाइते भएका छन् ।
घाइते हुनेमा सोही वडाका ३३ वर्षीया शीला आले र ३५ वर्षीय कुमार पाण्डे रहेको प्रहरी नायब उपरीक्षक श्यामु अर्यालले जानकारी दिए । वसन्तपुरमा माटो खन्ने क्रममा माथिबाट खसेको ढिस्कोले पुरिएर उनीहरु घाइते भएका हुन् । दुवै जनाको चितवनस्थित जिल्ला अस्पतालमा उपचार भइरहेको छ । (रासस)
