जापानसहित बिभिन्न देश पठाइदिन्छु भन्दै लाखौंको रकम ठगी गर्ने तीन जना पक्राउ

काठमाडौं । वैदेशिक रोजगारीको लागि बिभिन्न देश पठाइदिने बहानामा लाखौंको रकम ठग्ने तीन जना पक्राउ परेका छन् ।

सल्यान कपुरकोट गाउँपालिका-२ घर भई हाल काठमाडौं टोखा नगरपालिका-५ बस्दै आएका २३ वर्षीय टोपेन्द्र रानामगर पक्राउ परेका हुन् । उनलाई टोखाबाटै मंगलबार पक्राउ गरिएको काठमाडौं उपत्यका अपराध अनुसन्धान कार्यालयले जनाएको छ ।

रानामगरले जापान पठाइदिने बहानामा दुई जनाबाट ४२ लाख ३० हजार रुपैयाँ ठगी गरेको उजुरी प्रहरीमा परेको थियो । रकम लिएर सम्पर्कविहीन भएपछि उनीविरूद्ध दुई जनाले प्रहरीमा उजुरी दिएका थिए । रानामगरलाई थप अनुसन्धान तथा कारबाहीको लागि वैदेशिक रोजगार विभाग ताहाचल पठाइएको छ ।

यस्तै, न्यूजील्याण्ड पठाइदिन्छु भन्दै एक जनाबाट साढे ९ ख ठगी गरेको आरोपमा बनेपा नगरपालिका-२ का ४० वर्षीय शिवराम घिमिरे र पोल्याण्ड पठाउने बहानामा दुई जनाबाट ४ लाख २० हजार रुपैयाँ ठगी गर्ने सोलुखुम्बु दुधकुण्ड नगरपालिका-५ का ३९ वर्षीय ङिमा शेर्पासमेत पक्राउ परेका छन् ।