काठमाडौं । जनता समाजवादी पार्टी, नेपालले सरकारले संसदमा प्रस्तुत गरेको भूमि अध्यादेशबारे शुक्रबार बृहत् अन्तरक्रिया गर्दैछ । जसपा नेपाल निकट बौद्धिक पेसाकर्मी महासंघ नेपालले विभिन्न राजनीतिक दलका शीर्ष नेता र विज्ञहरुको सहभागितामा भूमि अध्यादेशमाथि अन्तरक्रिया गर्न लागेको हो । 

काठमाडौंको नयाँ बानेश्वरस्थित इन्द्रेणी ब्यांक्वेटमा शुक्रबार दिउँसो आयोजना हुने अन्तरक्रियामा जसपा नेपालका अध्यक्ष उपेन्द्र यादव, एकीकृत समाजवादी पार्टीका अध्यक्ष माधवकुमार नेपाल, नेपाल समाजवादी पार्टी (नयाँ शक्ति) का अध्यक्ष बाबुराम भट्टराई, लोकतान्त्रिक समाजवादी पार्टीका अध्यक्ष महन्थ ठाकुरलगायतलाई आमन्त्रणा गरिएको छ । 

विज्ञ वक्ताको रुपमा विजयकान्त कर्ण, डा. उमाशंकर प्रसाद, गोपीनाथ मैनाली, शेखर यादव, माधव देव र नागेन्द्रप्रसाद यादवलाई आमन्त्रित गरिएको छ ।  सरकारले ल्याउन लागेको ६ वटा अध्यादेशमध्ये भूमिसम्बन्धी अध्यादेश राष्ट्रको हितमा नरहेको किटान गर्दै जसपा नेपालले त्यसको विपक्षमा मतदान गर्ने औपचारिक निर्णय गरिसकेको छ । भूमि अध्यादेश पारित भए देशभरिकै सार्वजनिक जग्गाको चरम दुरुपयोेग हुने भन्दै जसपा नेपालको अडानले गर्दा ती अध्यादेशहरु अहिले संसदमा अलपत्र परेका छन् । 

सबै अध्यादेव पारित गर्ने सरकारको रणनीति छ । तर त्यसमा जसपा नेपालको साथ महत्वपूर्ण हुन्छ । जसपाका राष्ट्रियष् सभामा तीन सांसद छन् । उपेन्द्र यादवले साथ दिएमा ओली सरकारलाई अध्यादेश पास गर्न सहज हुन्छ । नत्र नैतिक संकटमा प्रधानमन्त्री केपी ओली पर्ने अवस्था छ । जसपाले साथ नदिएमा सरकारले ६० दिनसम्म भुमिसम्बन्धी अध्यादेशलाई अघि नबढाउने बुझिएको छ ।