काठमाडौं । सिर्जनशील बिउ उत्पादक कृषक समूहका कृषकहरुले उत्पादन गरेको तरकारी बारिमै नकुहियोस् भनेर शनिबार बडिखेलमा हाटबजार लगाएको छ । 

७ वर्षदेखी १०० रुपैयाँ जम्मा गर्दै आएको यो संस्थाले अहिले २२ जनाको कार्यसमिति बनाएर हाटबजार सञ्चालनमा ल्याएको हो । घरेलु किसानहरुलाई फाइदा पुग्ने गरी हाटबजार सञ्चालनमा ल्याएको सिर्जनशील बिउ बैंकको अध्यक्ष नबिना नगरकोटीले बताइन् ।

उनले भनिन्, ‘हाटबजार  सञ्चालन गर्दा  घरेलु किसानहरुलाई धेरै नै फाइदा हुन्छ । करेसाबारीमा उत्पादन गरेको तरकारी फल्ने समयमा धेरै हुँदा कुहिएर जान्छ र हाम्रो मिहेनतको फल प्राप्त गर्न सकिँदैन । त्यहीँ समयमा करेसाबारीमा फलेको तरकारीहरु हाटबजारमा ल्याएर बेच्ने गर्दा राम्रो आम्दानी समेत हुन्छ । आफूसँग धेरै भएको तरकारी हाट बजारमा राखेर नभएको तरकारी साटेर खान पनि मिल्छ । यसै कारणले यो क्षेत्रका तरकारी कृषकहरु खुसी पनि छन् ।’

साथै उनले यो समूहमा ९३ जना कृषक रहेको समेत बताइन् । उनले एक जनाबाट सुरु गरेको यो संस्थामा अहिले ९३ जनामध्ये २२ जनाले कृषि नै गरिरहेको बताइन् । यो हाट बजार गाउँमा बस्नेहरुका लागि अत्यन्तै राम्रो भएको तरकारी हाटबजारमा किनमेल गर्न आउने ग्राहकहरुको भनाइ छ ।

हाट बजारमा रायो, काउली, मुला, च्याउ, कागती, टमाटर, बन्दा, हरीयो खुर्सानी, धनियाँ, गाजर , सिमीजस्ता तरकारीहरु बेच्नको लागि राखिएका छन् । दिनको २ हजारदेखि २५ सय सम्म आम्दानी हुने गरेको यहाँका कृषक व्यापारीहरु बताउछन् । साथै कहिलेकाहीँ हप्ताको ८ हजार रुपैयाँ समेत आम्दानी हुने गरेको उनीहरुको भनाइ छ ।  

तस्बिरहरु ः