२०७६-२-६ , सोमबार


एनसेल प्रकरणः दरपीठ हुनुपर्ने रिट कसरी भयो दर्ता ?

 

एनसेलको लाभकर प्रकरणमा सर्वोच्च अदालतको ५ सदस्यीय बृहत्पूर्ण इजलासले फैसला गरी टुंगो लगाएको बिषयमा पुनः रिट दर्ता हुनुलाई सबैले आश्चर्यका रुपमा लिएका छन् । सर्वोच्चले लाभकर असुली गर्न दिएको आदेशपछि ठूला करदाता कार्यालयले ६२ अर्ब हाराहारीमा कर निर्धारण गरेको थियो । उक्त कर निर्धारणपछि पनि एनसेलले खुरुखुरु तिर्नुको साटो सर्वोच्च अदालतमा रिट दायर गर्न गयो ।

 

उक्त रिट दर्ता नगरी दरपीठ गर्नुपर्नेमा एक सदस्यीय इजलासबाट अन्तरिम आदेश जारी गरी दुवै पक्षलाई छलफलमा बोलाएको छ । बृहत् पूर्ण इजलासले निरुपण गरिसकेको बिषयमा रिट दर्ता गरिनु, प्रधानन्यायाधीश चोलेन्द्रशमशेर राणाका अति निकट र उनले भनेअनुसारको काम गर्ने भनेर चिनिएका न्यायाधीश बमकुमार श्रेष्ठको इजलासमा राखी अन्तरिम आदेश दिनुले एनसेलको प्रभाव माथिसम्मै परेको अनुमान लगाउन सकिन्छ । 

 


बृहत्पूर्ण इजलासको ओजन नै नरहने गरी एक सदस्यीय इजलासले अन्तरिम आदेश दिनुभित्र के के खिचडी पाकेको छ भन्ने कुरा रहस्यकै गर्भमा छ । तर प्रधानन्यायाधीश चोलेन्द्रशमशेर राणाले ५ सदस्यीय बृहत् पूर्ण इजलास राखेर एनसेलले लाभकर तिर्नुपर्ने आदेश दिएका कारण न्यायपालिका सुधारमा उनी लागेको भन्ने अनुभूति गर्न थालिएको थियो । तर एक महिना नपुग्दै न्यायपालिका सुधारको उनको त्यो कदम सस्तो लोकप्रियता आर्जनका लागि थियो भन्ने अवस्था आएको छ ।

 

भेटिंदै नभेटिएको ३३ किलो सुन प्रकरणमा थुनामा रहेका धनाढ्य आरोपी र प्रहरी अधिकारीलाई उच्च अदालतले साधारण तारिखमा छाडेको बिषयमा मुख्यन्यायाधीश डा. कुलरत्न भूर्तेलसहित ८ न्यायाधीशलाई न्यायपरिषदमा तानियो । सर्वोच्च अदालतमा पनि त्यो सुनका मुद्दा प्रधानन्यायाधीश आफैंले चासो दिएर छिटोछिटो पेशी राखेर सुनुवाइ गरिरहेका छन् । तर २ बर्षअघि २०७३ पुसमा त्रिभुवन अन्तर्राष्ट्रिय विमानस्थलबाट बरामद भएको ३३ किलो सुनका बारेमा भने सर्वोच्चमा मुद्दाको पेशी नै ढिलो राख्ने गरिएको छ ।

 

उक्त मुद्दामा चासो नै दिइएको छैन । उक्त सुन प्रकरणमा मुछिएका एसएसपी श्याम खत्री, भन्सारमा कार्यरत एक्सरेका कर्मचारी श्यामकृष्ण श्रेष्ठ र भन्सारका तथ्यांक अधिकृत श्रीनारायण यादवलाई छाड्ने उच्च अदालत पाटनका न्यायाधीश बलभद्र बाँस्तोला र भीमराज ओझालाई भने अझैसम्म केही कारबाही भएको छैन ।

 

भेटिंदै नभेटिएको सुनका आरोपी छाड्ने न्यायाधीश तानिने तर भेटिएको सुनका आरोपी छाड्ने न्यायाधीशमाथि न्यायपरिषदको ध्यान किन नपुगेको हो ? श्यामकृष्ण श्रेष्ठले सुन तस्करी गरेर १४ करोड भन्दा सम्पत्ति आर्जन गरेको भेटिएको छ । श्याम खत्री उच्च अदालतबाट उन्मुक्ति पाएपछि एसएसपी बढुवा भए । उनी पुनः सुनतस्करीमा लागेको सनम शाक्यको हत्या र ३३ किलो सुन प्रकरणमा उनी पुनः पक्राउ परेपछि पुष्टी भएको छ ।

 

२०७३ मा बरामद भएको सुन दुबई बस्ने हरिशरण खड्का र रोशन भूसाल(गुप्तलाल)को थियो । उनीहरूबिरुद्ध प्रहरीले इन्टरपोलमार्फत् डिफ्यूजन नोटिस जारी गरी हरिशरण खड्का केही महिनाअघि दुवईमा पक्राउ परे । तर भुसाललाई भने प्रहरीले सेटिङ गरी विशेष अदालतमा हाजिर गरायो । र, उनले मुद्दा जिते । अहिले उनको मुद्दा पनि सर्वोच्च अदालतमा छ । सुन तस्कर भूसाल उक्त मुद्दा पनि सेटिङ गरी जित्नका लागि दिनरात लागिरहेका छन् ।                  – हरिराम शर्मा, सुकेधारा, काठमाडौं 
 


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal