२०७६-२-६ , सोमबार


सरकारमा बस्ने अनि वैकल्पिक शक्ति भन्ने पक्षमा हामी छैनौं

 

० नयाँ राजनीतिक संस्कार र भिजनसहितको दल बनाउने भनेर कस्सिएर लाग्नु भएको थियो । अब सकिँदैन भन्ने निष्कर्षमा पुग्नु भएको हो ?


–सुरुमा नयाँ शक्ति पार्टी गठन गर्दा हामीले जे भनेका थियौं अहिले पनि हामी त्यसमा अडिग छौं । बरु, त्यसलाई थप व्यापक बनाउनतिर हामी लागेका छौं । 

 


० तर, नयाँ शक्ति पार्टी त तपाईंहरूले संघीय समाजवादी फोरमजस्तो दललाई सुम्पिनु भयो नि ?


–हामीले पार्टी गठन गरेको पहिलो दिनदेखि नै भन्दै आएका थियौं कि नयाँ शक्ति तीन तरिकाले बन्छ । पहिलो पुराना राजनीतिक दल आफैं रुपान्तरित भएर । पुराना दल रुपान्तरित नभए पनि ती दलभित्रका व्यक्तिहरू रुपान्तरित भएर । यी दुवै तरिका काम नलागेको खण्डमा पनि बिल्कुल शून्यबाटै भए पनि नयाँ शक्ति बन्न सक्छ भनेर हामीले भनेका थियौं । यही प्रक्षेपणअनुरुप ३ वर्षअघि हामीले नयाँ ढंगबाट नयाँ शक्ति पार्टी आरम्भ गरेका थियौं । योबीचमा हामीले पुराना तथा नयाँ राजनीतिक दलहरूसँग छलफल गरिरहेका छौं । अहिले हामीले संघीय समाजवादी फोरमसँग पार्टी एकता टुंग्याएका छौं । 

 


० विगतमा नयाँ शक्ति बनाउने बेला यी पुराना दलहरूलाई म्याद गुज्रेको औषधि भन्नु भएको थियो । भाका त छिट्टै फेरियो नि ?


–कांग्रेस, एमाले र माओवादीबाट अब परिवर्तन सम्भव छैन भनेर हामीले भनेका हौं तर फोरमलाई हामीले कहिल्यै पनि म्याद गुज्रेको औषधि भनेका छैनौं । फोरमलाई अलि फरक दृष्टिकोणले हेर्नुपर्छ । यसको इतिहास र शैली नहेरी निष्कर्ष निकाल्यौं भने त्यो वस्तुनिष्ठ नहुन सक्छ ।

 


० फोरम नेकपाको वर्तमान सरकारमा सहभागी छ । विगतमा पनि फोरमले यिनै दलहरूसँग लाभहानीको राजनीति गरेकै हो । फोरम अरु दलभन्दा भिन्न हो भन्दा लोकले पत्याउँछ?


–पुराना दलहरूसँग फोरमको तुलना हुन सक्दैन । उसको इतिहास पनि त्यति लामो छैन । कान्छो दलहरूमध्येको यो पनि एक हो । मधेस आन्दोलनबाट उदय भएको दल हो यो । यसले बोकेको विचार, कार्यदिशा भिन्न छ । र, यसले बोकेको विचार र कार्यदिशाको मूल्यांकनपछि नै हामीले पार्टी एकताको निर्णय गरेका हौं । 

 


० तर, मान्छेहरू बाबुरामले नयाँ शक्ति बनाउन नसकेपछि फोरममा जबरजस्त लगेर बिलय गरायो भनिरहेका छन् नि ?


–मान्छेहरूले के भन्छन् भन्ने एउटा कुरा हो । हाम्रो डकुमेन्ट्समा के लेखिएको छ र हामीले कस्तो व्यवहार गरिरहेका छौं भन्ने दोस्रो कुरा हो । त्यसकारण सत्य सत्य नै हुन्छ । हामीले पार्टीको नाममा नै समाजवादी पार्टी, नेपाल भनेर राखेका छौं । अबको गन्तव्य पनि त्यही अनुरुप नै तय हुनेछन् । आगामी दिनमा काम गरेर नै यस्ता आरोपहरूको जवाफ हामी दिनेछौं ।

 


० समाजवादी पार्टी नेपाल, अब कस्तो पार्टी बन्छ त ?  


–तीनवटा पार्टी अहिले विश्वमा अस्तित्वमा छन् । प्रजातन्त्रवादी, साम्यवादी र समाजवादी विचार बोक्ने पार्टी । समाजवादी विचार बोक्ने पार्टीभित्र पनि हाम्रोचाहिँ कम्युनिस्टले भनेको समाजवाद र पुँजीवादीले भन्ने गरेको समाजवादभन्दा भिन्न समाजवाद हो । त्यो समाजवादको नाम नै हामीले समुन्नत संघीय समाजवाद भनेर दिएका छौं । यहाँनिर सबैलाई उस्तै हुन् भनेर ट्याग लगाउनु वैज्ञानिक तर्क हुन सक्दैन । 

 


० पुराना दलको कार्यशैली भएन, अब नयाँ संस्कारसहितको राजनीतिक संस्कार विकास गर्नुपर्छ भनेर अन्य दलहरू पनि खुलेका छन् । त्यसतर्फ सोझिनु पर्ने एकता पुरानै दलतर्फ मोडियो भन्ने खालको विश्लेषण पनि भइरहेका छन् । यसबारे तपाईंको धारणा के छ ?


–मैले अघि नै भनेँ कि हामी विभिन्न राजनीतिक पार्टीहरूसँग छलफल चलाइरहेका छौं । सत्ताधारी नेकपा, प्रमुख प्रतिपक्षीको भूमिकामा रहेको नेपाली कांग्रेस र राजावादी पुरातनवादी शक्ति राप्रपा मक्किएका दल हुन् । यिनीहरूसँग हाम्रो एकताका लागि कुनै पनि संवाद हुँदैन । यिनीहरू बाहेकका प्रगतिशील शक्तिहरू सबैसँग छलफल गर्छौं भनेका छौं । विगतमा पनि हामीले छलफल गरेका हौं । तर फोरमसँग मात्र हाम्रो कुरा मिल्यो । र, एकताका लागि हामीबीच सहमति जुटेको छ । 

 


० फोरमबाहेकका अरु दलसँग पनि एकताको सम्भावना छ भन्नु भयो । कुन–कुन दलसँग त्यस्तो सम्भावना छ, बताइदिनुहोस् न ?


–विवेकशील पार्टी, जनमुक्ति पार्टी, विजय गच्छदारबाट विभाजन भएर गएको भानुराम चौधरीले गठन गरेको दललगायतसँग हामीले छलफल जारी राखेका छौं । फोरमसँगको एकता त हाम्रो सुरुवात मात्रै हो । यो त निकै अगाडि बढ्छ । फैलिन्छ । 

 


० राजपासँग पनि एकताको प्रयास भइरहेको समाचारहरू प्रकाशमा आइरहेका छन् । सत्य के हो ?


–हो, राजपासँग पनि एकताको सम्भावना छ । कुरा पनि भएकोथियो । तर, सहमति जुट्न सकेको छैन । आउँदा दिनमा यसबारे थप छलफल गरेर वैकल्पिक राजनीतिक शक्ति निर्माणको कामलाई अघि बढाउँछौं । 

 


० सबै दलहरूसँग एकताको प्रयास गर्दा पार्टी भित्रचाहिँ पर्याप्त छलफल भएन भन्ने सुनिँदै छ, पार्टीमा छलफल गर्न कन्जुस्याइँ गर्नु भएको हो ?


–होइन, हामीले यसबारेमा पर्याप्त छलफल गरेका छौं । छलफलपछि नै हामी यस्तो निष्कर्षमा पुगेका हौं । पार्टीमा छलफल भएन भन्ने कुरामा कुनै सत्यता छैन ।

 


० प्रगतिशील शक्तिसँग पार्टी एकता गर्ने भन्नु हुन्छ । अनि व्यावहारमा पुराना षडिएका दलसँग एकता गर्दै हुनुहुन्छ । अलि वैचारिक अलमलजस्तो देखियो नि ?


–हामी कुनै पनि वैचारिक अलमलमा छैनौं, प्रष्ट छौं । अस्पष्ट छैनौं । कुनै पनि दल आफ्ना कमीकमजोरी सुधारेर रुपान्तरणका साथ आउँछ भने त त्यसलाई सकारात्मकरुपमा नै लिनुपर्छ नि होइन र ?

 


० तपाईंहरूले जेजस्तो तर्क अघि सारे पनि शक्ति राष्ट्रहरूको योजनामा फोरम–नयाँ शक्ति एक ठाउँमा उभिए भनिँदैछ । यसको जवाफ कसरी दिनुहुन्छ ?


–सबैलाई थाहा छ, ३ वर्षदेखि हामी निरन्तर नयाँ वैकल्पिक राजनीतिक शक्ति निर्माणमा जुटिरहेका छौं । समृद्धि र सुशासन नै हाम्रो मुख्य लक्ष्य हो । यसका लागि अघि बढ्दा मानिसहरूमा दृष्टिदोष हुन्छ भने हामीलाई भन्नु केही पनि छैन । आउने दिनमा कामबाट नै हामी त्यस्ता आरोप लगाउनेहरूलाई जवाफ दिन चाहन्छौं ।

 


० नयाँ शक्ति साँच्चै बन्छ त अब ?


–नयाँ वैकल्पिक राजनीतिक शक्ति निर्माण गर्नुको अब विकल्प छैन । ढिलो चाँडो यो बन्छ । फोरम–नयाँ शक्ति एकताले यसमा थप आशा जगाएको छ । 

 


० सत्तारुढ फोरमसँग तपाईंहरू एक हुनु भएको छ । नयाँ एकीकृत पार्टी सरकारमै रहिरहन्छ कि बाहिरिन्छ ?


–नयाँ शक्ति फोरम एकतापछि सरकारमै रहन्छ कि बाहिरिन्छ भन्ने जिज्ञासा सर्वत्र छ । सरकारमा पनि बस्ने र आफूलाई वैकल्पिक राजनीतिक शक्ति पनि भन्ने पक्षमा हामी छैनौं । यसबारे हामी घोषणासभा कार्यक्रमबाटै प्रष्ट पार्नेछौं । 

 


० सरकारबारे सहमतिचाहिँ जुटिसकेको हो ?


–हो, यो विषयमा पनि हामीबीच सहमति भइसकेको छ । के सहमति भयो भन्ने चाहिँ नसोध्नूस् । २०७६ वैशाख २३ को पार्टी घोषणासभामा नै यसबारे सबै कुराहरू छर्लंग पारिने छ । 

 


० अब नयाँ बन्ने पार्टीको वैचारिक लाइनबारे कुरा गरौं । यसको विचारचाहिँ कस्तो हुन्छ ?


–हामी समुन्नत संघीय समाजवादी पार्टी निर्माण गर्न चाहन्छौं । अहिले मुख्यतया पुँजीवादी, साम्यवादी र समाजवादी पार्टी छन् । हामी पृथक ढंगको समाजवादी पार्टी निर्माण गर्न चाहिरहेका छौं । यसमा पनि समुन्नत संघीय समाजवादी पार्टी बनाउन चाहेका हौं । हाम्रँे पार्टी समावेशी, समानुपातिक हुन्छ । सुशासन र सदाचारको पक्षमा यो दल उभ्भिने छ । तेस्रो यो पार्टी समुन्नत समाजवादमा विश्वास गरेर अघि बढ्ने छ । समग्रमा समतामूलक समृद्धि हुँदै विकासको बाटोमा अघि बढ्ने पार्टी हुनेछ । 

 


० नेतृत्वको विषय पनि निकै महत्त्वपूर्ण हुन्छ । नयाँ पार्टीको नेतृत्व उपेन्द्र यादवले गर्दै हुनुहुन्छ कि बाबुराम भट्टराईले ?


–हामीले सांगठनिकस्वरुप कस्तो हुने भन्ने टुंगो पनि लगाइसकेका छौं । वैशाख २३ गते पार्टी घोषणासभामा नै यी सबै विषयबारे हामी जानकारी दिनेछौं । 

 


० दुई तिहाइको बहुमतप्राप्त सरकारको हालै आर्थिक वर्ष ०७६÷७७ का लागि नीति तथा कार्यक्रम ल्याएको छ । यसबारे तपाईंहरूको धारण के छ ?


–राष्ट्रपतिले सार्वजनिक गर्नु भएको नीति तथा कार्यक्रम २०७६ वैशाख २१ गते शनिबार सार्वजनिक गर्नु भएको छ । तर यसको सकारात्मक चर्चा भन्दा पनि जताततै नकारात्मक चर्चा मात्रै सुनिन्छ । राष्ट्रपतिले प्रयोग गरेको पदावलीलाई लिएर सामाजिक सञ्जाल तातेको छ । विकास र समृद्धिका कार्यक्रमहरू त ल्याएको छ, तर हावादारी । हामीले प्राप्त गरेको संघीय लोकतान्त्रिक गणतन्त्र संस्थागत गर्ने, शान्तिको जगमा टेकेर समृद्धिको यात्रा तय गर्ने कुरामा यो सरकारको कुनै ध्यान पुगेको देखिँदैन । बरु यो सरकार विस्तारै विस्तारै सर्वसत्तावादी सोचसहित अगाडि बढ्न सकेको देखिन्छ । 

 


० देशको राजनीतिक कता जान्छ त उसो भए अब ?


–रसियामा जस्तै अभ्यास अहिले नेपालमा भइरहेको छ । हेर्दा लोकतन्त्रमा चाहिने सबै अवयब देखिन्छ । तर, अदृश्य ढंगले त्यस्ता अवयवहरूमा अंकुश लगाइएको छ । कतै यो सरकार निरंकुशतातर्फ उन्मुख त छैन भन्ने आशंका पछिल्ला सरकारका गतिविधिहरूले उब्जाएको छ । यसलाई सरकारले सुधार्नुपर्छ । अन्यथा यसले देशलाई सही दिशातर्फ जानबाट रोक्नेछ । 


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal