२०७६-१-७ , शनिबार


आठौं राष्ट्रिय खेलकुद : सदस्य सचिवको ठट्टा !

 
काठमाडौँ । आठौं राष्ट्रिय खेलकुद खेलबाडमा परिणत हुने हो कि भन्ने चिन्ता ब्यक्त गर्न थालिएको छ । राष्ट्रिय खेलकुद परिषद (राखेप)ले लामो समयको रस्साकस्सीपछि २०७६ बैशाख ५ देखि ११ गतेसम्म राष्ट्रिय खेलकुद प्रदेश नम्बर–५ मा आयोजना गर्ने निर्णय गरेको छ । तर, त्यो निर्णयले कतिलाई असर पर्छ भन्ने हेक्का गर्न राखेप चुकेको खेलाडीहरू बताउछन् ।

 

त्यो समयमा आयोजनास्थल नेपालगञ्जमा अत्यन्त गर्मी हुने सम्भावना छ । त्यतिमात्र हैन  बैशाख १५ देखि कक्षा १२ र त्यसको १५ दिनपछि कक्षा ११ को वार्षिक परीक्षा सुरु हुँदैछ । आठौं राष्ट्रिय खेलकुदमा सहभागी हुने करीब ७ हजार खेलाडीमध्ये कतिपयको परीक्षाको समय पर्ने भएकाले उनीहरूमा अनावश्यक दबाब थपिने निश्चित मानिएको छ । 

 


एकातिर खेलाडीहरू मानसिक दवावमा खेल्नुपर्ने हुन्छ भने अर्कातिर प्रदेश–५ मा हुने खेलहरू सबै त्यही प्रदेशमा हुने छैनन् । राष्ट्रिय खेलकुद गर्नुको उद्देश्य नै बिर्सेर राखेपले हचुवामा आफ्ना योजना बनाएको आरोप लागेको छ । फरक फरक स्थानमा राष्ट्रिय खेलकुद गर्नुको उद्देश्य हो त्यो क्षेत्रको विकास । प्रदेश–५ मा राष्ट्रिय खेलकुद हुँदैछ भने विकास पनि त्यहीँकै हुनुपर्छ । भौतिक पूर्वाधार त्यहीँकै बन्नुपर्ने हो । मुस्किलले उद्घाटन र समापन गर्न मिल्ने रंगशाला नेपालगञ्जमा बन्दैछ । 

 


तर, दुर्भाग्य कतिपय खेलहरू प्रदेश–४ को पोखरा र प्रदेश–३ को काठमाडौं र भक्तपुरसम्म खेल हुनेछन् । यसले कसको भलो हुन्छ ? प्रतियोगिताको उद्घाटन २०७६ बैशाख ५ मा हुने भए पनि यही चैत २७ देखि नै खेलहरू सुरु हुनेछन् । ३५ खेलहरूमध्ये काठमाडौंमा हुने गल्फ र स्क्वास तथा पोखरामा हुने पाराग्लाइडिङसहित अन्य सामूहिक खेल यसै वर्ष सुरु हुनेछन् । 

 


पूर्वाधारमा निकै समय खर्चेको राखेपले बक्यौता रकमसमेत नतिरेकाले ढिलाई भइरहेको राखेप स्रोतले बताएको छ । त्यसैगरी प्रतियोगिता सञ्चालन खर्चका लागि समेत रकम निकासा नभएको बताइन्छ । रकमको कुरा गर्न खोज्दा राखेपका पदाधिकारीहरू तैंचुप मैंचुप रहने गरेको छन् गुनासो सुनिन्छ । युवा तथा खेलकुद मन्त्रालय, राखेप केन्द्र र प्रदेश पाँचका पदाधिकारीबीच साँठगाँठमा तलमाथि परेकाले राष्ट्रिय खेलकुद आयोजनामा ढिलाइ भएको स्रोत बताउँछ । 

 


राखेपका सदस्यसचिव केशवकुमार विष्ट भने गर्मीको विषय उठाउँदा ख्यालठट्टा गरेर विषय मोड्ने गर्दै आइरहेको आरोप छ । उनले बैशाखमा नेपालगञ्जमा धेरै गर्मी भएकाले खेलाडी खेल्न नसक्ने कुरा उठ्दा ‘नेपालगञ्ज नगएकाहरूलाई मात्र यसको चासो रहेको’ प्रतिक्रिया दिने गरेको बताइन्छ । 

 


एक कार्यक्रममा उनले भने, ‘खेलाडीलाई समस्या छैन, प्रशिक्षकलाई समस्या छैन, पदाधिकारीलाई समस्या छैन तर विदेशमा बस्नेहरूलाई गर्मी र वर्षाको चिन्ता हुने गरेको छ ।’ उनले कसरी दोषारोपण गर्न सकिन्छ भनेर केही मिडिया लागेको आरोपसमेत लगाएका छन् । 

 


उनले हिमालबाट आएका र पहाडबाट नेपालगञ्ज पुग्ने खेलाडीलाई जतिसक्यो एसी संचालनको व्यवस्था गर्ने जनाएका छन् । नेपालगञ्जमात्र हैन बाँके, दाङ, कपिलबस्तु र रुपन्देहीमा पनि खेल हुने भएकाले त्यहाँ पनि गर्मीको समस्या हुने खेलाडीहरू बताउछन् । 

 


खेलाडी र खेलकुदका लागि प्रतिकूल वातावरण र मौसमका बारेमा कुरा उठ्दा सदस्यसचिव विष्टले भने ख्यालठट्टा गरेरै ढाकछोप गर्ने गरेको आरोप छ । पहिलोपल्ट संघीय संरचनाअनुसार खेलकुद आयोजना हुँदै गर्दा गैरआवासीय नेपाली संघ (एनआरएन) को टोली पनि पहिलो पटक सहभागी हुँदैछरु। आठौं राष्ट्रिय खेलकुदमा ७ प्रदेश, तीन विभागीय र एनआरएन गरी ११ टोलीको सहभागिता रहने छरु। एनआरएन टोलीमा ९ देशका २४ खेलाडी समावेश छन् ।

 


३५ खेलका करीब ७ हजार खेलाडीले २ हजार ६ सय ८७ पदकका लागि प्रतिस्पर्धा गर्नेछन् । २०७५ मंसिरमा सुरु गर्ने भनिएको प्रतियोगितामा मन्त्रालय र राखेपबीच समन्वय हुन नसक्दा खेलाडीहरू मारमा पर्ने देखिन्छ । अर्कातिर काठमाडौंमै केही खेलहरू हुनु भनेको ती खेलको विकास प्रदेश–५ मा नहुने निश्चित हुनु हो । 

 


किनकि त्यहाँ त्यसको पूर्वाधान तयार हुने छैन । यसले गर्दा राष्ट्रिय खेलकुदको मर्ममाथि नै प्रहार हुने निश्चित छ । आठौं राष्ट्रिय खेलकुद खेलबाडमा परिणत हुने चिन्ता त्यसैकारण ब्यक्त गर्न थालिएको छ ।   
 


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal