२०७६-१-७ , शनिबार


'श्रीमान'ले महासचिव ताकेपछि बार निर्वाचनमा अन्तर्घात  !!

साँघुन्यूज डटकम सम्बाददाता

काठमाडौं । नेपाल बार एशोसिएसनको २०७५ फागुन १६ मा भएको निर्वाचनमा प्रगतिशील पेशागत तथा समावेशी समूहले २५ सदस्यीय कार्यसमितिमा अध्यक्षसहित २२ सिटमा बिजय हासिल गरेको छ । महासचिवसहित एक उपाध्यक्ष र एक सदस्य बृहत लोकतान्त्रिक समूहले जितेको छ । 


प्रगतिशील समूहबाट महासचिवका उम्मेदवार सुरेन्द्र बहादुर थापामाथि पूर्वएमालेनिकट कानून ब्यवसायीले नै अन्तर्घात गरी हराइदिएका छन् । जसको नेतृत्व ३ नम्बर प्रदेशका उपाध्यक्ष ईश्वरी भट्टराईले नै गरेको आरोप छ । उच्च अदालत बार एशोसिएसन पाटनबाट सा“ढे ४ सयभन्दा बढी एमाले निकट कानून ब्यवसायीहरुले लोकतान्त्रिकका महाचिवका उम्मेदवार लीलामणि पौडेललाई क्रस गरेका थिए ।

 

अध्यक्ष चण्डेश्वर श्रेष्ठ र महासचिवमा पौडेललाई उच्च अदालत बारका वकिलहरुले मतदान गरेका थिए । त्यसो त अधिवक्ता टीकाराम भट्टराईमाथि पनि थापालाई अन्तर्घात गरेर हराएको आरोप छ । गुट निरपेक्ष भद्र स्वभावका थापा सर्वोच्च अदालत बारको सदस्य र सचिव भई विवादरहित रुपमा काम गरेका कानून ब्यवसायी हुन् । कानून ब्यवसायीबीचमा उनी सबैप्रति समभाव राख्ने भनेर चिनिन्छन् । तर, पनि उनलाई अन्तर्घात गरी हराइएको छ ।

 

ईश्वरी भट्टराई महासचिव हुने दाउमा थिए । त्यसका लागि उनी निकै लागे । यसअघि उनकी श्रीमती बिष्णुमाया भूसाललाई बारको सदस्य बनाइसकेको र यो पटक पनि श्रीमानलाई महासचिव चाहिने भन्ने प्रश्न उठेपछि साविक एमालेको कानून विभाग प्रमुख रघु पन्तले सुरेन्द्र बहादुर थापालाई महासचिवको उम्मेदवार बनाएका थिए ।

 

सुरेन्द्र बहादुर थापालाई महासचिवको उम्मेदवार बनाउनासाथ भट्टराईहरुले पन्तलाई देखाइदिने भनी डीएलएका पौडेललाई मत दिन भित्रभित्रै आफ्नो पक्षकालाई सर्कुलर गरेका थिए । जुन निर्वाचनको परिणामपछि देखिएको छ । बारमा अध्यक्षसहित दुई तिहाई भन्दा बढी प्रगतिशीलले जिते पनि महासचिवमा हार्नुपरेको छ ।  


      सत्तारुढ दल बाम निकट प्रगतिशील, पेशागत तथा समावेशी समूहका अध्यक्षका उम्मेदवार चण्डेश्वर श्रेष्ठ विजयी   हुँदा उनका प्रतिद्वन्द्वी लोकतान्त्रिकका सुनीलकुमार पोखरेल पराजित भए । श्रेष्ठले चार हजार २२ मत ल्याए भने पोखरेलले तीन हजार आठ सय ७३ मत प्राप्त गरे ।


नेपाल बारको २५ सदस्यीय कार्यसमितिमा २२ जना प्रगतिशील समूहबाट उम्मेदवार बनेका विजयी भए । बारमा सत्तारूढ नेकपा निकट प्रगतिशील समूहबाट एक अध्यक्ष, कोषाध्यक्ष, सात जना उपाध्यक्ष र १३ केन्द्रीय सदस्य समेत निर्वाचित भएका छन् ।

 


सानो जनमत संग्रहको रुपमा हेरिएको नेपाल बार एशोसियसन निर्वाचनको यो जितसंगै कार्यसमितिमा प्रगतिशील समूहलाई स्पष्ट दुई तिहाइ जित हात परेको छ । प्रदेश–५ को उपाध्यक्षमा लोकतान्त्रिक समूहबाट उम्मेदवार बनेका सुनीलकुमार श्रेष्ठ तीन हजार नौ सय ८६ मत र मधेसी/मुस्लिम खुला सदस्यमा मनोजकुमार चौधरी तीन हजार नौ सय ३० मत ल्याएर विजयी भए ।


महासचिवमा  सुरेन्द्र कसरी हारे ?


बारको महासचिवमा लोकतान्त्रिक समूहका लीलामणि पौडेल विजयी हुँदा प्रगतिशील समूहका सुरेन्द्र बहादुर थापा  पराजित भए । पौडेलले थापालाई चार सय ७७ मत अन्तरले पराजित गरे । पौडेलले चार हजार एक सय ७८ ल्याउँदा थापाले तीन हजार सात सय एक मत मात्र प्राप्त गरे ।


सुरेन्द्र बारका लागि नयाँ  अनुहार थिए । उनी बारको केन्द्रीय सदस्य पनि थिएनन् । पूर्व नेकपा एमाले निकट रहेका थापालाई नेकपाका नेता रघुजी पन्तले जबर्जस्ती पेलेर टिकट दिलाएका त हुन् तर बारमा अन्तरघात भयो र रघुजी पन्तको हिसावकितावले हावा खायो ।


थापाले महासचिवमा जितेको खण्डमा नेपाल बारको तीन वर्षपछि हुने निर्वाचनमा उनी अध्यक्ष पदको दावी गर्छन् भन्ने सर्कुलर भित्रभित्रै भुसको आगो जसरी फैलाइयो । अतरघातको यो प्रपञ्च थापाले बुझ्नै सकेनन् जसले गर्दा थापालाई काठमाडौकै मतदाताले धोका दिए । उनलाई हराउन बुनिएको यस्तो प्रपञ्च अहिले वकिलहरुबीच व्यापक चर्चामा छ ।


महासचिवमा थापालाई हराउन पूर्व माओवादीहरु र अध्यक्ष पदका उम्मेदवार चण्डेश्वर नै स्वयम् कम्मर कसेर लागेको आरोप लागेको छ । लोकतान्त्रिक समूहका एक वकिलका अनुसार महासचिवमा सुरेन्द्र बहादुर थापा हार्नु पूर्व एमाले र माओवादी वकिलहरुबीचको अन्तर्घात नै मुख्य कारण हो । 


नेपाल बार निर्वाचनमा १० हजार एक सय ४१ मतदाता थिए । जसमध्ये आठ हजार तीन सय २८ जनाले मतदानमा सहभागिता जनाएका थिए ।  
 


 


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal