२०७६-१-७ , शनिबार


 क्षेत्री समाजको तेस्रो केन्द्रीय महाअधिवेशन शुरु        

        पोखरा, २३ चैत : क्षेत्री समाज नेपालको दुईदिने तेस्रो केन्द्रीय महाअधिवेशन आजबाट पोखरामा शुरु भएको छ । राष्ट्रिय अखण्डता र जातीय सद्भावनाका निम्ति ‘क्षेत्री एकता आजको आवश्यकता’ मूल नाराका साथ शुरु भएको सो अधिवेशनमा ४२ जिल्लाको ४५० प्रतिनिधिको सहभागिता छ ।

    
     
सो महाअधिवेशनको उद्घाटन गर्दै सांसद एवं समाजका सल्लाहकार सूर्यबहादुर केसीले जातीय सद्भावलाई कायम राख्दै क्षेत्री समाजले धर्म र संस्कृतिको जर्गेना गर्ने समाजको रुपमा पहिचान बनाएको बताए । राष्ट्रिय एकता र अखण्डताका लागि क्षत्रीले गरेको बलिदानको स्मरण गर्दै उनले मुलुकलाई एकताबद्ध बनाएर अगाडि बढ्नका लागि क्षेत्री समाजलाई अग्रसर भएर अगाडि बढ्नुपर्ने सुझाव दिए  ।     


     
पूर्वप्रधानसेनापति रुक्माङगद् कटवालले पहिलो नेपाली हुनुपर्ने स्मरण गराउँदै नेपाल र नेपालीको अस्तित्व र अखण्डताको रुक्षाका लागि क्षेत्री समाजलाई सबै धर्म, समुदायलाई एकसूत्रमा बाँधेर नेतृत्वको भूमिका निर्वाह गर्नुपर्ने आवश्यकता औँल्याए  । क्षेत्री समाजका पूर्वअध्यक्ष दिलबहादुर क्षेत्रीले मुलुकको सहअस्तित्वको रक्षा गर्नुपर्ने उल्लेख गर्दै क्षेत्रीलाई संविधानमा अन्यमा राखिएकाले क्षेत्रीलाई पहिचानविहीन बनाउन खोजिएको आरोप लगाए  ।     


     
सांसद् देवेन्द्रराज कँडेलले क्षेत्रीले मुलुुकको रक्षाका लागि अनेकौँ युद्ध लडेको उल्लेख गर्दै मुलुकको एकताका साथै धर्म र संस्कृतिको रक्षाका लागि पनि प्रतिबद्ध हुनुपर्ने विषयमा जोड दिए  । गण्डकी प्रदेशसभाका सदस्य एवं पूर्वमन्त्री कुमार खड्काले क्षेत्री एकतालाई खण्डित हुन नदिन र तिक्ततालाई बिर्सेर नयाँ नेतृत्वको चयन गर्नुपर्ने उल्लेख गरे  ।  

  
     
गण्डकी प्रदेशका सदस्यद्वय कृष्ण थापा र रवीन्द्रकुमार थापाले राष्ट्रिय अखण्डतालाई अक्षुण्ण राख्न र जातीय सद्भावलाई अझ बलियो बनाउन क्षेत्री समाजलाई नेतृत्वको भूमिका निर्वाह गर्न सल्लाह दिए  । अर्का प्रदेश सदस्य पुष्पा केसी (भण्डारी)ले क्षेत्री समाजलाई मार्गदर्शन दिने खालको नयाँ नेतृत्वको चयन हुनुपर्ने विषयमा जोड दिए  ।    

 
     
पोखरा महानगरपालिकाका प्रमुख मानबहादुर जिसीले नयाँ नेपालको निर्माण क्षेत्री समाजलाई एकतावद्ध भएर महत्वपूर्ण भूमिका निर्वाह गर्नुपर्ने उल्लेख गरे  । यसअघि, पोखराको चिप्लेढुङ्गाबाट शुरु भएको क्षेत्री समाजको ¥याली बजारको परिक्रमा गर्दै सभामा परिणत भएको थियो ।     
(रासस)
।  


प्रतिक्रिया दिनुहोस

CONTACT US

साँघु न्यूज नेटवर्क

फोन ४२३०७४८

[email protected]

sanghunews.com, यतिप्लाजा, बागबजार

KEEP IN TOUCH

ABOUT US

सम्पादक : रामकला बुढाथोकी / सूचना विभाग दर्ता प्रमाणपत्र नं. ६७६/०७४–७५/   राजनीतिक चस्का र झस्काका लागि  ३९ वर्ष अघि पंचायती क्रुर कालखण्डमा जन्मिएर जेल, नेल, दर्ता खारेजको समेत साँघु साप्ताहिकले सामना गर्दै प्रजातन्त्र, विधिको शासन, भ्रष्टतन्त्रको जरोकिलो उखेल्ने अभियानमा सक्रिय हुँदै नेपाली पत्रकारिता जगतमा आफ्नैपन अंगालेर पाठकहरुको... पूरा पढ्नुहोस

© २०१७ साँघुद्वारा प्रकाशित/सर्वाधिकार सुरक्षित     |     WEBSITE by : i-Tech Nepal